ព័ត៌មានជាតិ

Update៖ ឈប់ម៉ូតូឲ្យរថយន្តឆ្លងផ្លូវ ត្រូវរថយន្តបើកពីក្រោយបុកទាំងកម្រោលកិនម៉ូតូជាប់ក្រោមរថយន្ត រងការខូចខាតយ៉ាងដំណំ

ភ្នំពេញ: បុរសម្នាក់ បានលោតចេញពីលើម៉ូតូភ្លាមៗ ហើយសំណាងល្អមិនបណ្ដាលឲ្យរបួស ខណ:ដែលដែររូបគាត់ជិះម៉ូតូឈប់កណ្ដាលផ្លូវឲ្យរថយន្តបត់ឆ្លងផ្លូវ ហើយត្រូវរថយន្តមួយគ្រឿងទៀតបើកមកពីក្រោយបុកទាំងកម្រោលបណ្ដាលឲ្យគៀបម៉ូតូជាប់ក្រោមរថយន្ត រងការខូចខាតយ៉ាងដំណំ។

បង្កឲ្យមានការភ្ញាក់ផ្អើលនិងកកស្ទះចរាចរណ៍យ៉ាងខ្លាំងនេះនៅវេលាម៉ោង១និង៥០នាទីរសៀល ថ្ងៃទី២៨ ខែមិថុនា ឆ្នាំ២០១៧ នៅតាមបណ្ដោយផ្លូវព្រះមុន្នីរ៉េត ២១៧ ត្រង់ចំណុចមុខបុរី ប៉េង ហ៊ួត ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ។ ក្នុងហេតុការណ៍នេះក៏មានរថយន្ត២គ្រឿងទៀតបានបុកបន្តកន្ទុយគ្នារងការខូចខាតផងដែរ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេសង្កេតឃើញបុរសម្នាក់ជិះម៉ូតូមួយគ្រឿងម៉ាក វីវ៉ា ពណ៌ខៀវ ពាក់ស្លាកលេខ ភ្នំពេញ 1BN-9537 បានធ្វើដំណើតាមបណ្ដោយផ្លូវមុន្នីរ៉េត ទិសដៅពីត្បូងទៅជើង ខណ:មកដល់ចំណុចកើតហេតុ ក៏បានឈប់ម៉ូតូនៅកណ្ដាលផ្លូវ ដើម្បីឲ្យរថយន្តមួយគ្រឿងមិនចាំម៉ាក បើកបត់ឆ្លងផ្លូវចូលបុរី ។

ប្រភពដដែលបានបន្តថា បន្ទាប់ពីម៉ូតូជនរងគ្រោះបានឈប់ហើយនោះ ក៏មានរថយន្តបង្កម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3D-3391 បើកបរដោយបុរសម្នាក់ រួមដំណើរដោយបុរស២នាក់ជាមួយ បានបើកមកស្របទិសគ្នាក្នុងល្បឿនយ៉ាងលឿន ហើយចាំហ្វាំងមិនទាន់ក៏ជ្រុលទៅបុកម៉ូតូរងគ្រោះទាំងកម្រោល បណ្ដាលឲ្យម៉ូតូគៀបជាប់ក្រោមរថយន្ត រងការខូចខាតយ៉ាងដំណំ សំណាងល្អម្ចាស់ម៉ូតូឃើញសភាពមិនល្អបានលោតចេញពីម៉ូតូទាន់ពេល មិនបណ្ដាលឲ្យរងរបួសនោះឡើយ ។

ក្រោយពេលកើតហេតុភ្លាមៗ ភាគីខាងរថយន្តបង្កបានសុំធ្វើការសម្របសម្រួលជាមួយភាគីខាងម៉ូតូរងគ្រោះ ខណ:ដែលកំពុងចចារគ្នា ក៏មានរថយន្តម៉ាកកូរ៉ូឡា ពាណ៌សំបកឪឡឹក ពាក់ស្លាកលេខភ្នំពេញ2C-7244 ដែលដឹកអ្នកដំណើរ បានបើកស្របទិសគ្នា ដោយល្បឿនសិនស៊ឹមៗ ហើយត្រូវរថយន្តកុងតឺន័រ មួយគ្រឿងទៀតម៉ាកSTERLING ពណ៌ស ពាក់ស្លាកលេខភ្នំពេញ 3D-7260 បានបើកមកបុករថយន្តកូរ៉ូឡាពីក្រោយថែមទៀត បណ្ដាលឲ្យក្រពឹតកាងក្រោយបន្ទិចបន្ទួច ហើយក៏ធ្វើឲ្យមានការកក់ស្ទះចរាចរណ៍យ៉ាងខ្លាំងតែម្ដងនៅតាមបណ្ដោយផ្លូវកើតហេតុខាងលើ ។

ដោយមានការសម្របសម្រួលពីកម្លាំងសមត្ថកិច្ចមូលដ្ឋានទទួលផ្នែកចរាចរណ៍ ចុះជួយសម្រួលធ្វើចរាចរណ៍ និងជួយសម្រួលករណីគ្រោះថ្នាក់ចរាចរណ៍ខាងលើផងដែរនោះ ទើបភាគីរថយន្តបង្កម៉ាក ហ៊ីយ៉ាន់ដាយ ដែលបុកម៉ូតូ បានសងការខូចខាតចំនួន១០ម៉ឺនរៀល ហើយខាងរថយន្តកុងតឺន័រដែលបើកបុករថយន្តកូរ៉ូឡា បានសងការខូចខាតចំនួន៨០ដុល្លារផងដែរ ដើម្បីបញ្ចប់រឿងនៅនឹងកន្លែងកើតហេតុ ហើយមួយសន្ទុះក្រោយមក ការធ្វើដំណើរបស់ប្រជាពលរដ្ឋក៏រលូនជាធម្មតាវិញ៕

មតិយោបល់