ភ្នំពេញ: មានករណីគ្រោះថ្នាក់ចរាចរណ៍បង្កឡើងដោយរថយន្តសាំងរបស់ក្រុមហ៊ុន LHR ស៊ីទែនធំ មួយគ្រឿង បានបើកគៀម៉ូតូ មួយគ្រឿងទៀតពេញទំហឹង បណ្តាលឲ្យស្ត្រីម្នាក់ស្លាប់នៅនឹងកន្លែងកើតហេតុ ចំណែកឯរថយន្តបង្កបានបើកគេចខ្លួនបាត់ដោយសុវត្ថិភាព។

ហេតុការណ៍នេះបានកើតឡើងកាលពីវេលាម៉ោង ១រសៀល ថ្ងៃទី២៩ ខែមិថុនា ឆ្នាំ២០១៧ ស្ថិតនៅចំណុចស្ពានព្រែកព្នៅ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

សពនារីរងគ្រោះមានឈ្មោះ ស៊ុន សុគន្ធារី អាយុ១៧ឆ្នាំ មុខរបរ សិស្ស ស្នាក់នៅភូមិក្រាំងធ្នុង សង្កាត់ ខណ្ឌសែនសុខ រាជធានីភ្នំពេញ។ ចំណែកឯអ្នកបើកបររថយន្តដឹកសាំងខាងលើ ពុំបានស្គាល់អត្តសញ្ញាណនោះឡើយ។

ប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុ នារីរងគ្រោះបានជិះម៉ូតូ មួយគ្រឿង ម៉ាក Zoomer-X ពណ៌ស ពាក់ស្លាកលេខ ភ្នំពេញ1FK-4641 ដោយជិះក្នុងទិសដៅពីកើតមកលិច ខណ:ដែលធ្វើដំណើរមកដល់ចំណុចគល់ស្ពានព្រែកព្នៅ ស្រាប់តែមានរថយន្ត មួយគ្រឿង មិនចាំម៉ាកបានបើកមកគៀម៉ូតូជនរងគ្រោះ ដែលធ្វើដំណើរស្របទិសដៅគ្នានោះ បានដួលបោកក្បាលនឹងថ្នល់ បណ្តាលឲ្យស្លាប់បាត់បង់ជីវិតភ្លាមៗនៅកន្លែងតែម្តង។ ក្រោយពីកើតហេតុ រថយន្តបង្កបានបើកគេចខ្លួនបាត់ ដោយបន្សល់ទុក្ខតែសពនារីរងគ្រោះនៅទីនោះទេ។

ក្រោយមក សមត្ថកិច្ចមូលដ្ឋានបានមកដល់កន្លែង នឹងបានទាក់ទងទៅសមត្ថកិច្ចជំនាញការិយាល័យចរាចរណ៍ជើងគោក រាជធានីភ្នំពេញ ដើម្បីមកធ្វើការវាស់វែង។ ចំណែកឯសាកសពនារីរងគ្រោះខាងលើ ត្រូវបានសមត្ថកិច្ចប្រគល់ឲ្យទៅក្រុមគ្រួសារយកទៅធ្វើបុណ្យនៅឯវត្ត តាំងកសាងខាងត្បូង៕