កំពត: ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីរថយន្តដឹកប្រេងរបស់ក្រុមហ៊ុនកម្ពុជាតេលា បើកក្នុងល្បឿនលឿនបុកម៉ូតូពេញទំហឹង បណ្តាលឲ្យអូសជាច្រើនម៉ែត្រ បុរសម្នាក់បានស្លាប់ភ្លាមៗនៅនឹងកន្លែង។

ហេតុការណ៍នេះបានកើតឡើង នៅវេលាម៉ោង ៨ និង២០នាទីយប់ ថ្ងៃទី២៩ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ33 ស្ថិតក្នុងភូមិត្រពាំងធំឃុំត្រពាំងសង្កែ ស្រុកទឹកឈូ ខេត្តកំពត។

លោកអនុសេនីយ៍ឯក ឈុន ឈឿន នាយផ្នែកសេនាធិការស្រុកទឹកឈូ បានឲ្យដឹងថា គ្រោះថ្នាក់ចរាចរណ៍នេះគឺបង្កឡើង រវាងរថយន្ដIZUZU ពាក់ស្លាកលេខ ភ្នំពេញ3B-4242 ជារថយន្តដឹកសាំងរបស់ក្រុមហ៊ុនតេឡា បើកបរក្នុងទិសដៅស្របគ្នា ពីកើតទៅលិច (ហើយអ្នកបើកបរបានរត់គេចខ្លួនបាត់) បានបុកម៉ូតូម៉ាកវ៉េវអាល់ហ្វា ពណ៌ខ្មៅ ពាក់ស្លាកលេខ1E-6425 ជិះដោយឈ្មោះ ម៉ី ទិត្យារិទ្ធ ភេទប្រុស អាយុ២៦ឆ្នាំ ស្នាក់នៅភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត អូសជាច្រើនម៉ែត្រ បណ្តាលឲ្យបុរសខាងលើស្លាប់ភ្លាមៗតែម្តង។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង នឹងនាំយករថយន្តនិងម៉ូតូ មករក្សាទុករង់ចាំការដោះស្រាយគ្នាពេលក្រោយ។ ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារយកធ្វើបុណ្យតាមប្រពៃណី៕