កំពង់ចាមៈ មានករណីប្លន់មួយបានកើតឡើង ដោយជនសង្ស័យជាជាងជួសជុលរថយន្ត និងជាចោរដែលធ្វើសកម្មភាពផ្ទាល់ បានប្លន់ជនរងគ្រោះដែលជាអ្នកហៅឲ្យមកជួយជួសជុលរថយន្ត រួចរត់គេចខ្លួនបានតែប៉ុន្មានម៉ោងក៏ត្រូវសមត្ថកិច្ចដេញតាមចាប់ខ្លួនបានតែម្តង។

ហេតុការណ៍នេះបានកើតឡើងកាលពីវេលាម៉ោង ៧ព្រឹក ថ្ងៃទី២៩ ខែមិថុនា ឆ្នាំ២០១៧ ស្ថិតនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម។

លោកវរសេនីយ៍ឯក ទុំ ចាន់ណា នាយការិយាល័យព្រហ្មទណ្ឌកម្រិតធ្ងន់ខេត្ត បានឲ្យដឹងថា ក្រោយពីទទួលបានព័ត៌មានអំពើប្លន់ខាងលើនេះរួចមក លោកឧត្តមសេនីយ៍ត្រី ហេង វុទ្ធី ស្នងការរងទទួលផែនព្រហ្មទណ្ឌ ក្រោមការបញ្ជារ របស់លោកឧត្តមសេនីយ៍ស្នងការ បានបញ្ជាឲ្យកម្លាំងជំនាញរបស់លោកប្រញាប់ចុះសហការជាមួយ និងនគរបាលក្រុងកំពង់ចាម ចុះទៅកាន់ផ្ទះកើតហេតុជាបន្ទាន់ ដោយបានសួរនាំអ្នករងគ្រោះបានឲ្យដឹងថា ជនដែលបានចូលប្លន់នោះ គឺជាងជួសជុលរថយន្ត ដែលឪពុកម្តាយអ្នករងគ្រោះឈ្មោះ ពិសិដ្ឋ ហៅមកជួសជុលរថយន្តដល់ផ្ទះកើតហេតុនោះ។

ប្រភពដដែលបន្តថា លុះដល់រសៀលថ្ងៃដដែល ចោរប្លន់ឈ្មោះ សុខ វណ្ណឌី ភេទប្រុស អាយុ២៣ឆ្នាំ ស្នាក់នៅភូមិថ្លុកក្រវ៉ាន់ ឃុំបុសខ្នុរ ស្រុកចម្ការលើ ត្រូវបានកម្លាំងទៅឡោមព័ទ្ធចាប់បាន នៅវេលាម៉ោង១និង៣០នាទីរសៀល ដោយបានដកហូតខ្សែដៃ១តម្លឹង របស់អ្នករងគ្រោះ តែខ្សែ.ក ត្រូវបានជននេះឲ្យជាងរំលាយជាដុំ រួមនិងថ្នាំញៀន២កញ្ចប់ផងដែរ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់៕