ភ្នំពេញៈ គ្រោះថ្នាក់ចរាចរណ៍មួយ បង្កឡើងដោយរថយន្តម៉ាកRAV4 មួយគ្រឿង បើកបរដោយបុរសជនជាតិបរទេសម្នាក់ ក្នុងល្បឿនលឿនជ្រុលទៅបុកក្បាលព្រួញចែកទ្រូងផ្លូវពេញទំហឹង បណ្តាលឲ្យរថយន្តឡើងទំជាប់នៅលើក្បាលព្រួញទាំងព្រឹកព្រលឹមតែម្តង។

ហេតុការណ៍នេះបានកើតឡើងកាលពីវេលាម៉ោង៥និង២០នាទី ព្រឹកថ្ងែទី១ ខែកក្កដា ឆ្នាំ២០១៧ ស្ថិតនៅតាមបណ្តោយផ្លូវព្រះមុនី្នវង្ស កែងនិងផ្លូវលេខ២១៧ ស្ថិតក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាក RAV4 ពណ៌សំបកឪឡឹក ពាក់ស្លាកលេខភ្នំពេញ 2B- 8045 បើកបរដោយបុរសម្នាក់ ជាជនជាតិបរទេស បានធ្វើដំណើរតាមបណ្តោយផ្លូវព្រះមុនី្នវង្ស ក្នុងទិសដៅពីត្បូងទៅជើង ក្នុងល្បឿនយ៉ាងលឿន ខណៈ មកដល់កន្លែងកើតហេតុ ផ្លូវបែកជាបួន បើកបរមិនព្រមបន្ថយល្បឿន ក៏បានរេចង្កូតរថយន្តជ្រុលទៅបុកក្បាលព្រួញចែកទ្រូងផ្លូវយ៉ាងពេញទំហឹង បណ្តាលឲ្យរថយន្តឡើងទំជាប់នៅលើក្បាលព្រួញទាំងព្រឹកព្រលឹម។ ចំណែកក្បាលព្រួញបានរងការខូចខាត ប៉ុន្តែមិនបង្កឲ្យនរណាម្នាក់រងរបួសនោះឡើយ។ រីឯអ្នកបើកបររថយន្តបានរត់គេចខ្លួនបាត់ស្រមោលពីកន្លែងកើតហេតុ ។

ក្រោយពេលកើតហេតុហើយនោះ សមត្ថកិច្ចជំនាញបានចុះមកធ្វើការវាស់វែងយករថយន្តទៅរក្សាទុកនៅការិយាល័យស្នងការនគរបាលរាជធានីភ្នំពេញដើម្បីដោះស្រាយនៅពេលក្រោយតាមផ្លូវច្បាប់បន្តទៀត៕