កណ្តាលៈ សមត្ថកិច្ចឃាត់ខ្លួនជនសង្ស័យម្នាក់ ពាក់ពន្ធ័នឹងករណីហិង្សាដោយចេតនា។
ហេតុការណ៍បានកើតឡើងនៅវេលាម៉ោង៦ និង១០នាទីយប់ ថ្ងៃទី៣០ ខែមិថុនា ឆ្នាំ២០១៧ ចំណុចភូមិល្វាទោង ឃុំកំពង់កុង ស្រុកកោះធំ ខេត្តកណ្ដាល។

ជនរងគ្រោះឈ្មោះ ធឿន ថែ ភេទប្រុស អាយុ ២៧ឆ្នាំ ស្នាក់នៅភូមិទួលស្វាយ ឃុំកំពង់កុង ស្រុកកោះធំ ខេត្តកណ្ដាល មុខរបរ កសិករ។ ចំណែកជនសង្ស័យឈ្មោះ ខា ឃាង ភេទប្រុស អាយុ ៣៧ឆ្នាំ ស្នាក់នៅភូមិល្វាទោង ឃុំកំពង់កុង ស្រុកកោះធំ ខេត្តកណ្ដាល មុខរបរ កសិករ (ឃាត់ខ្លួន)។ វត្ថុតាងចាប់យក៖ ដែកចុងស្រួច ដែកឆាប ប្រវែង ៩ ស.ម មានដងឈើប្រវែង ៩ ស.ម។

មុនពេលកើតហេតុខាងលើ ជនសង្ស័យ បានផឹកស្រាស ជាមួយមិត្តភក្ដិ នៅចំណុចផ្ទះឈ្មោះ ឈាង ឡេង ក្នុងភូមិកើតហេតុខាងលើ ។ ក្រោយពេលផឹកស្រាសអស់ប្រមាណជា៤លីត្រ ស្រាប់មានឈ្មោះ តែម និងជនរងគ្រោះឈ្មោះ ធឿន ថែ បានដើរចូលមកផឹកជាមួយ ដោយកាន់ស្រាផែនដីចំនួន១ដប មកផឹកជាមួយក្រុមជនសង្ស័យ ។ នៅពេលនោះស្រាប់តែមិត្តភក្ដិជនសង្ស័យ បានទាក់ពាក្យសម្ដីគ្នាជាមួយនិងឈ្មោះ តែម ព្រមជាមួយនិងជនរងគ្រោះ ឃើញដូចនោះជនសង្ស័យក៏បានប្រកែក និងបបួលជនរងគ្រោះវាយគ្នាតទល់ រួចពួកគេក៏បានប្រតាយប្រតប់គ្នា ហើយជនរងគ្រោះបានទាត់ត្រូវជនសង្ស័យ១ជើង ។ លុះមកដល់ពេលកើតហេតុខាងលើ ជនសង្ស័យ មានការខឹងសម្បារនិងជនរងគ្រោះដែលទាត់ត្រូវចំខ្លួន ក៏បានជិះម៉ូតូទៅយកដែកមុខស្រួច(ដែកឆាប)ពីផ្ទះរបស់ឈ្មោះ ឈាង ណន មកបបួលជនសង្ស័យវាយគ្នាម្ដងទៀត ពេលមកដល់ជនសង្ស័យក៏បានយកដែកឆាបនោះចាក់ទៅលើជនរងគ្រោះ ចំនួន ១ដែកឆាប ចំផ្នែកខ្នង បោះដៃផុត ចំហៀងខាងស្ដាំ បណ្ដាលអោយរងរបួសដួលសន្លប់តែម្ដង រួចហើយជនសង្ស័យបានព្យាយាមរត់គេចតែត្រូវអ្នកជិតខាងនាំគ្នាចាប់ប្រគល់អោយសមត្ថកិច្ច ចំណែកជនរងគ្រោះត្រូវក្រុមគ្រួសារបញ្ជូនមកកាន់មន្ទីរពេទ្យបង្អែកស្រុកកោះធំ ។

បច្ចុប្បន្នជនសង្ស័យ និងវត្ថុតាងដែកឆាប ត្រូវបានឃាត់ខ្លួននៅអធិការដ្ឋាននគរបាលស្រុកកោះធំ ដើម្បីបន្តចាត់ការតាមនីតិវិធី ឯជនរងគ្រោះដោយមានសភាពធ្ងន់ធ្ងរត្រូវបានបញ្ជូនទៅព្យាបាលបន្តនៅមន្ទីពេទ្យក្រុងភ្នំពេញ៕