ភ្នំពេញៈ គ្រោះថ្នាក់ចរាចរណ៍មួយបានកើតឡើង ដោយគ្រាន់តែប៉ះគ្នាបន្តិចបន្តួចសោះរវាងម៉ូតូនិងម៉ូតូ តែបែរជាកើតហិង្សាវាយប្រតាយប្រតប់គ្នាពេញផ្លូវ បណ្ដាលឲ្យរងរបួសស្រាលរៀងៗខ្លួនធ្វើឲ្យមានការភ្ញាក់ផ្អើលយ៉ាងខ្លាំងដោយអ្នកធ្វើដំណើរនិងសមត្ថកិច្ចចុះមកអន្តរាគមន៍។

ហេតុការណ៍នេះបានកើតឡើងកាលពីវេលាម៉ោង១០យប់ ថ្ងៃទី១ ខែកក្កដា ឆ្នាំ២០១៧ ស្ថិតនៅតាមបណ្តោយផ្លូវលេខ២១៧ ម្តុំផ្សារស្ទឹងមានជ័យចាស់ ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ ពាក់អាវ ពណ៌ខៀវ ជិះម៉ូតូមួយគ្រឿងម៉ាក ស្មាស់វី ពណ៌ក្រហម ពាក់ស្លាកលេខ ភ្នំពេញ 1BM-1622 ធ្វដំណើរតាមបណ្ដោយផ្លូវព្រះមុនីរ៉េត ក្នុងទិសដៅពីកើតទៅលិច ខណៈមកដល់ចំណុចកើតហេតុ គាត់បានបត់ម៉ូតូមកខាងឆ្វេងឆ្លងចន្លោះទ្រូងផ្លូវ ដើម្បីត្រឡប់ទៅក្រោយវិញ ខណៈនោះស្រាប់តែទៅបុកនឹងម៉ូតូមួយគ្រឿងទៀតម៉ាក ស្មាស់វី ពណ៌ខ្មៅ ពាក់ស្លាកលេខ ភ្នំពេញ 1AC-1560 ជិះដោយបុរសម្នាក់ ពាក់អាវពណ៌លឿង ដែលធ្វើដំណើរពីលិចទៅកើត បណ្ដាលឲ្យដួលរៀងៗខ្លួន រងការខូចខាតម៉ូតូទាំងសងខាង។ ភ្លាមៗនោះអ្នកជិះម៉ូតូទាំង២មិនបានដោះស្រាយគ្នាដោយសន្តិវិធីនោះទេ បែរជាកើតហិង្សា វាយប្រតាយប្រតប់គ្នាដួលពេញផ្លូវបណ្ដាលឲ្យរងរបួសស្រាលទាំងសងខាង និងបង្កការភ្ញាក់ផ្អើលយ៉ាងខ្លាំងដល់អ្នកធ្វើដំណើរនិងសមត្ថកិច្ច។

ទោះជាយ៉ាងណាសមត្ថកិច្ចបានចុះដល់កន្លែងកើតហេតុ ដើម្បីឲ្យភាគីទាំងសងខាងធ្វើការចរចារគ្នា ទើបក្រោយពេលកើតហេតុប្រហែល១០នាទី ភាគីទាំសងខាងបានត្រូវរ៉ូវគ្នាវិញ និងបញ្ចប់រឿងនៅនឹងកន្លែងកើតហេតុ ដោយគ្មាននរណាសងនរណានោះឡើយ៕