ព័ត៌មានជាតិ

ចុមខ្លាំងមែន! ឡើងផ្ទះមេភូមិ គ្រាន់តែគាត់សួរឡើងធ្វើអី ចុះទាញដំបងវាយ..

កណ្តាល: ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ក្រោយពីប្រើហិង្សាដោយចេតនាលើជនរងគ្រោះហើមមុខខាងឆ្វេង។
កើតហេតុថៃ្ងទី៤ ខែកក្កដា ឆ្នាំ២០១៧ វេលាម៉ោង៥ និង៣០នាទីល្ងាច នៅចំណុច ភូមិស្វាយ ឃុំព្រៃពួច ស្រុកអង្គស្នួល ខេត្តកណ្តាល។

ជនរងគ្រោះឈ្មោះ នាង សាន ភេទប្រុស អាយុ៦៣ឆ្នាំ មុខរបរ មេភូមិ ស្នាក់នៅភូមិស្វាយ ឃុំព្រៃពួច ស្រុកអង្គស្នួល ខេត្តកណ្តាល ហើមមុខខាងឆ្វេងនិងប៉ោងជើងសក់ខាងឆ្វេង។ ចំណែកជនសង្ស័យឈ្មោះ កុយ គឿន ភេទប្រុស អាយុ៣៧ឆ្នាំ មុខរបរ កម្មកររោងចក្រ នៅភូមិស្វាយ ឃុំព្រៃពួច ស្រុកអង្គស្នួល ខេត្តកណ្តាល។ វត្ថុតាងចាប់យកដំបងឈើជ្រុង២កំណាត់។

មុនពេលកើតហេតុ ជនរងគ្រោះជិះកង់មកពីធ្វើការនៅការដ្ឋានទឹកស្អាត ស្រាប់តែឃើញជនសង្ស័យឡើងលើផ្ទះកូនរបស់ខ្លួន ទើបជនរងគ្រោះ ឈប់កង់ហើយសួរថា«ឡើងផ្ទះកូនរបស់ខ្ញុំ មានការអី» ពេលនោះជនសង្ស័យ ស្ទុះចុះមកពីលើផ្ទះហើយទាញដំបងឈើជ្រុងមកយារវាយលើជនរងគ្រោះ ពេលយារវាយដំបងឈើជ្រុងនោះពុកបាក់ វាយមិនត្រូវ ទើបសង្ស័យដាល់ទៅលើជនរងគ្រោះ២ដៃ ត្រូវចំភ្នែកខាង ពកចិញ្ចើមខាងឆ្វេង ហើយដាល់១ដៃទៀតត្រូវចំគុមថ្គាមខាងឆ្វេង រួចច្រានជនរងគ្រោះដួល អុកគូថទៅដី។

បច្ចុប្បន្នជនសង្ស័យឃាត់ខ្លួននៅអធិការដ្ឋានដើម្បីកសាងសំណុំរឿង បន្តចាត់ការតាមនីតិវិធី៕

មតិយោបល់