ភ្នំពេញៈ ករណីគ្រោះថ្នាក់ចរាចរណ៍នេះកើតឡើងរវាងរថយន្ត និងម៉ូតូ បណ្តាលឲ្យបុរស២នាក់របួសធ្ងន់ស្រាល។

ហេតុការណ៍កើតឡើងនៅវេលាម៉ោង៧ និង៤០នាទីយប់ ថ្ងៃទី៥ ខែកក្កដា ឆ្នាំ២០១៧ ដែលស្ថិតនៅភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

រថយន្តបង្កម៉ាក សាំយុង ពណ៌ស្ករ ពាក់ស្លាកលេខ ភ្នំពេញ2Y-3243 ជារថយន្តតាក់ស៊ី រីឯម៉ូតូជនរងគ្រោះ ស៊េរីឆ្នាំ០១៣ ពាក់ស្លាកលេខ ភ្នំពេញ1CP-0069 ដែលបើកបរដោយបុរស២នាក់ រងរបួសធ្ងន់ស្រាល ម៉ូតូរងកាខូចខាតផ្នែកខាងក្រោយយ៉ាងដំណំផងដែរ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តបង្កបានធ្វើដំណើរក្នុងទិសដៅកើតទៅលិច ដោយស្របទិសគ្នាជាមួយម៉ូតូពេលមកដល់ចំណុចកើតហេតុ ដោយសារមានការកកស្ទះចរាចរណ៍ ទើបជនរងគ្រោះដែលជិះម៉ូតូបានបន្ថយល្បឿនដូចគេឯង ពេលនោះរថយន្តបង្កបានវាក់អើ ជាន់ហ្វ្រាំងមិនស៊ីផងនោះ ទើបបណ្តាលឲ្យទៅបុកម៉ូតូពីក្រោយពេញទំហឹងតែម្តង។

ជនរងគ្រោះ ត្រូវបានបញ្ជូនទៅសង្គ្រោះនៅឯមន្ទីពេទ្យ រីឯម្នាក់ទៀតនៅចាំនឹងកន្លែងដើម្បីធ្វើរកាដោះស្រាយគ្នា ដោយមានការចុះអន្តរាគមន៍ពីសម្ថិតកិច្ចប៉ុស្តិ៍ប្រចាំមូលដ្ឋានផងទើបការដោះស្រាយនេះបញ្ចប់ ដោយភាគីខាងរថយន្តព្រមសងថ្លៃខូចខាតទាំងអស់ដល់ជនរងគ្រោះ៕