ភ្នំពេញៈ នារីស្រស់ស្អាតម្នាក់បំរើការងារលក់ខោអាវតាមផ្ទះបន្ទាប់ពីចាកចេញពីផ្ទះទៅធ្វើការងារ ស្រាប់តែបាត់រហូតមិន ដឹងថាទៅណាមកណា ធ្វើឲ្យម្តាយដើរស្វែងរកអស់រយៈពេលជាង១០ថ្ងៃហើយ នៅតែមិនឃើញ។

កូនស្រីដែលបាត់ខ្លួននោះឈ្មោះ លី ចិន ភេទស្រី អាយុ១៩ឆ្នាំ មុខរបរលក់ខោអាវតាមផ្ទះ មានឪពុកឈ្មោះ ប៉ិត សុង អាយុ ៤៥ឆ្នាំ មុខរបរធ្វើស្រែ រឺឯម្តាយឈ្មោះ ឈន ចន អាយុ៤០ឆ្នាំ មុខរបរធ្វើស្រែ អ្នកទាំង៣នាក់មានស្រុកកំណើតនៅភូមិដំណក់ ឃុំឈើតុម ស្រុកក្រគរ ខេត្តពោធិ៍សាត់។

ម្តាយនារីនោះបានប្រាប់ឲ្យដឹងថា កូនស្រីរបស់គាត់បានចេញពីស្រុកកំណើតមកធ្វើការលក់ខោអាវឲ្យគេនៅតាមផ្ទះ នៅម្តុំអគារ៤២ជាន់ ស្ថិតក្នុងសង្កាត់បឹងកេងកង១ ខណ្ឌចំការមន បានរយៈពេលមួយឆ្នាំមកហើយ ក៏ប៉ុន្តែតាំងពីកូនរបស់គាត់មកធ្វើការនៅទីនោះរយៈពេលមួយឆ្នាំមក រូបគាត់មិនដែលស្គាល់និងមិនដែលមកលេងនៅកន្លែងកូនធ្វើការនោះទេ រហូតដល់បាត់កូនស្រីកន្លងមក រូបគាត់បានទាក់ទងកូនស្រីតាមទូរសព្ទ ហើយកូនស្រីរបស់គេបានមកលេងផ្ទះក្នុងមួយខែម្តងរៀងរាល់ពេលបើកប្រាក់ខែរួច។

ម្តាយនារីនោះបានប្រាប់បន្តថា កូនរបស់គាត់បានមកធ្វើការជាមួយមិត្តភ័ក្ត្រ បន្ទាប់មកក៏បាត់ដំណឹងកូនស្រីរបស់គាត់ ហើយរូបគាត់បានទៅសួរដំណឹងពីមិត្តភ័ក្ត្ររបស់កូនគាត់ដែរ តែមិត្តភ័ក្ត្ររបស់គេបានប្រាប់ថា កូនអ្នកមីងបានប្តូរទៅលក់ខោអាវជាមួយថៅកែផ្សេង ដោយរូបគេក៏មិនដែលស្គាល់ទីតាំងលក់នោះដែរ។

ម្តាយនារីនោះបានបន្តទៀតថា នៅមុនពេលបាត់កូនស្រីរបស់គាត់នៅថ្ងៃទី៣ ខែមិថុនា ឆ្នាំ២០១៧ កូនស្រីរបស់គាត់បានមកលេងផ្ទះដើម្បីចូលរួមការបោះឆ្នោត បន្ទាប់ពីចូលរួមបោះឆ្នោតរួចនៅថ្ងៃទី៧ ខែឆ្នាំដដែរ កូនស្រីរបស់គាត់បានសុំគាត់ត្រឡប់ទៅធ្វើការវិញនៅភ្នំពេញ។

លុះនៅថ្ងៃទី២៧ ខែឆ្នាំដដែល រូបគាត់បានខលទៅកូនស្រីគាត់ ស្រាប់តែមិនចូល ដោយបិទទូរសព្ទមិនអាចទាក់ទងបានរហូតដល់ពេលនេះហើយ រូបគាត់និងប្តីបានដើររកនិងសួរតាមរយៈមិតភ័ក្ត្ររបស់គេ តែគ្មានលិចឮដំណឹងអ្វីសោះ។

ក្រោយមកឪពុកម្តាយនារីខាងលើ បានលើកដៃសុំអំពាវនាវដល់សមត្ថកិច្ចនិងបងប្អូនជាសាធារណៈជន ប្រសិនបើឃើញក្មេងស្រីដូចមានភិនភាគខាងលើនេះ សូមមេត្តាជួយឃាត់និងផ្តល់ព័ត៌មានដល់ក្រុមគ្រួសារតាមរយៈលេខទូរសព្ទ ០៩៧ ៧៥ ៤០ ៩៣២៕