តាកែវ: លោកអធិការរងស្រុកបាទី បានប្រាប់Post Newsថា កម្លាំងនគរបាលនៃអធិការដ្ឋាន បានសហការជាមួយនិងកម្លាំងនគរបាលប៉ុស្តិ៍លំពង់ និងកម្លាំងសួនសត្វភ្នំតាម៉ៅ បានធ្វើការឃាត់ខ្លួនបានជនសង្ស័យចំនួន២នាក់ ដែលធ្វើសកម្មភាពឆក់ខ្សែដៃពីប្រជាពលរដ្ឋ តែមិនបានសម្រេច។

ការឃាត់ខ្លួននេះបានធ្វើឡើងកាលពីវេលាម៉ោង៦និង៣០នាទី ល្ងាចថ្ងៃទី៧ ខែកក្កដា ឆ្នាំ២០១៧ ស្ថិតនៅចំណុចភូមិរុន ឃុំចំបក់ ស្រុកបាទី ខេត្តតាកែវ។

ជនសង្ស័យទាំង២នាក់ដែលឃាត់ខ្លួនបានខាងលើនេះ ទី១មានឈ្មោះ លីន ឆានីត ភេទប្រុស អាយុ១៩ឆ្នាំ ស្នាក់នៅភូមិសេរីមានជោគ ឃុំកុមារាជា ស្រុកបាទី និងជនសង្ស័យទី២មានឈ្មោះ វ៉ាង ចម្រើន ភេទប្រុស អាយុ១៩ឆ្នាំ ស្នាក់នៅភូមិក្រាំងពង្រ ឃុំកុមារាជា ស្រុកបាទី បច្ចុប្បន្នសមត្ថកិច្ចកំពុងកសាងសំណុំរឿងបន្ត ដើម្បីបញ្ជូនខ្លួនចាត់ការតាមនីតិវិធីច្បាប់​បន្តទៀត៕