ក្រុមកំពូលទាំង២ នៃលីគកំពូលរបស់ថៃ Muang Thong United និងក្រុម Buriram United បានត្រឹមស្មើគ្នា ១-១ ប៉ុណ្ណោះ។

Muang Thong United ដែលត្រៀមមកប្រកួត នៅប្រទេសកម្ពុជា នាថ្ងៃទី ១៦ កក្កដា ខាងមុខនេះ បានខកចិត្តយ៉ាងខ្លាំង ក្រោយពីលេងបានត្រឹមស្មើក្រុមភ្ញៀវ ដ៍ខ្លាំង Buriram United ។ Muang Thong ពិតជាពិបាកក្នុងការរកបាន៣ ពិន្ទុនៅសប្តាហ៍ទី ២៣នេះណាស់ ព្រោះថា ក្រុមភ្ញៀវ បានរកគ្រាប់បាល់បាន ១គ្រាប់មុន នៅនាទីទី​ ៤៧មកម្លេះ ដោយកីឡាករ Baston ដែលបានដាក់សម្ពាធយ៉ាងខ្លាំងមកលើ ក្រុមម្ចាស់ផ្ទះ។ យ៉ាងណាក៍ដោយ ឆ្លងកាត់ការវាយបកយ៉សងខ្លាំងក្លាពីសំណាក់ក្រុម Muang Thong កីឡាករ Assumpcao រកបាន១គ្រាប់តាមស្មើវិញ នៅនាទីទី ៨៨ កៀកនឹងបញ្ចប់ការប្រកួតទៅហើយនោះ។

ឆ្លងកាត់ការប្រកួតនេះ ក្រុម Buriram United ឈរលើកំពូលតារាងដដែលដោយមាន ៥៣ ពិន្ទុ លើក្រុមលេខ ២ Muang Thong United ចំនួន ៤ពិន្ទុ​ខណះមានត្រឹម ៤៩ ពិន្ទុក្នុងដៃ។ ដូច្នេះហើយ រវាងក្រុម Buriram និង Muang Thong នៅមានសមរភូមិ​ស៊ីសាច់ហុតឈាមគ្នាជាបន្តទៀត ដើម្បីមហិច្ចតាប្រជែងយកពាន Thai Premire League ខណះការប្រកួតនៅសល់ច្រើនគួរសមដែរ។