កណ្ដាលៈ បុរសម្នាក់ជិះម៉ូតូចេញពីកន្លែងស៊ីផឹកបត់ឆ្លងថ្នល់ត្រូវរថយន្តបុកបណ្ដាលឲ្យរងរបួសធ្ងន់។

ហេតុការណ៍នេះបានកើតឡើងនៅវេលាម៉ោង៨និង៤៥នាទីយប់ ថ្ងៃទី៩ ខែកក្កដា ឆ្នាំ២០១៧ ត្រង់ចំណុចចន្លោះគីឡូម៉ែត្រ១៩និង២០ ភូមិគគីរ ឃុំគគីរ ស្រុកកៀនស្វាយ ខេត្តកណ្ដាល។

ជនរងគ្រោះមានឈ្មោះ ហម សុកុល ភេទប្រុស អាយុ៣៤ឆ្នាំជនជាតិខ្មែរ មុខរបរកសិករ មានទីលំនៅភូមិជ្រោយតាប៉ា ឃុំគគីរ ស្រុកកៀនស្វាយ ខេត្តកណ្ដាល។

នៅមុនពេលកើតហេតុ ជនរងគ្រោះបានជិះម៉ូតូមួយគ្រឿងម៉ាក់ស៊ុយស៊ូគីស្មាស់ ពណ៌ខ្មៅ ពាក់ស្លាកលេខ កណ្ដាល1I.3751ស៊េរី២០០៩ ចេញពីកន្លែងផឹកស៊ីឆ្លងផ្លូវពីខាងឆ្វេងដៃទៅខាងស្ដាំដៃ ក៏ស្រាប់តែមានរថយន្ដមួយគ្រឿងមិនស្គាល់ម៉ាក់បានបុកម៉ូតូជនរងគ្រោះបណ្ដាលឲ្យជនរងគ្រោះរងរបួសធ្ងន់ ហើយរថយន្ដដែលបុកម៉ូតូជនរងគ្រោះបានបើកគេចខ្លួនបាត់ស្រមោល។

បច្ចុប្បន្នជនរងគ្រោះត្រូវបានក្រុមគ្រួសារបញ្ចូនទៅព្យាបាលរបួសនៅមន្ទីរពេទ្យភ្នំពេញ៕