ព័ត៌មានជាតិ

Update៖ ឧត្តមសេនីយ៍ត្រីម្នាក់បើករថយន្តឡើងលើខឿនសួនច្បារចែកទ្រូងផ្លូវក្រឡាប់ផ្ងារជើងរងរបួសធ្ងន់!

ភ្នំពេញ: ឧត្តមសេនីយ៍ត្រីម្នាក់បើករថយន្តម៉ាកតូយ៉ូតា កាមរីស៊េរីឆ្នាំ១៩៨៩ ឡើងលើខឿនសួនច្បារពុះចែកទ្រូងផ្លូវ ក្រឡាប់ផ្ងារជើងឡើងលើ បណ្ដាលឲ្យរងរបួសបែកក្បាលយ៉ាងដំណំ។

ហេតុការណ៍នេះបានកើតឡើង កាលពីវេលាម៉ោង១២ និង៣០នាទី ថ្ងៃទី១០ ខែកក្កដា ឆ្នាំ២០១៧ នៅលើកំណាត់ផ្លូវទំនប់កប់ស្រូវ ត្រង់ចំណុចភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានី ភ្នំពេញ។

ប្រភពព័ត៌មានបានឲ្យដឹងថា ជនរងគ្រោះឈ្មោះ ចាន់ សុផល អាយុប្រហែលជាជាង៥០ឆ្នាំ ដែលមានឋានន្តរសក្ដិជាឧត្តមសេនីយ៍ត្រី ប៉ុន្តែមិនបានដឹងថាគាត់នៅអង្គភាពណាទេ ហើយពេលជួបគ្រោះថ្នាក់នោះ គាត់បានស្លៀកសំលៀកបំពាក់ក្នុងឯកសណ្ឋានយោធា។

តាមប្រភពដដែលបានបន្តថា នៅមុនពេលកើតហេតុ បុរសដែលជានាយទាហានរូបនោះ បានបើកបររថយន្ត១គ្រឿង ម៉ាកតូយ៉ូតាកាមរីស៊េរីឆ្នាំ១៩៨៩ ពណ៌ឈាមជ្រូក ពាក់ស្លាកលេខ ច-1400 ភព2 ធ្វើដំណើរក្នុងទិសដៅ ពីត្បូងទៅជើង ក្នុងល្បឿនលឿនមធ្យម លុះពេលមកដល់ត្រង់ចំណុចកើតហេតុខាងលើ មិនដឹងថាគាត់គេចម៉ូតូឬយ៉ាងណានោះទេ ទើបជ្រុលចង្កូតឡើងទៅលើខឿនសួនច្បារពុះចែកទ្រូងផ្លូវបណ្ដាលឲ្យក្រឡាប់ផ្ងារជើងឡើងលើរងរបួសធ្ងន់ធ្ងរតែម្ដង។

ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះរបស់អង្គភាព ៧១១ដឹកយកទៅសង្គ្រោះបន្ទាន់ ចំណែករថយន្តត្រូវនគរបាលស្ទូចឡើងនិងយកចេញពីកន្លែងកើតហេតុ នោះដើម្បីបញ្ចៀសការកកស្ទះចររាចរណ៍៕

មតិយោបល់