បាត់ដំបង: ជនរងគ្រោះពីរនាក់ជិះម៉ូតូជាមួយគ្នាត្រូវបានជនមិនស្គាល់មុខបាញ់ប្លន់យកម៉ូតូបានដោយសុវត្ថិភាព។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោងប្រមាណជា៩ព្រឹក ថ្ងៃទី១០ ខែកក្កដា ឆ្នាំ២០១៧ ត្រង់ចំណុចវាលស្រែក្បាលអាង ស្ថិតនៅភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង។

ប្រភពព័ត៌មានបានឲ្យដឹងថា ជនរងគ្រោះទី១ឈ្មោះ ហួត ឈឿង អាយុប្រហែល៤៥ឆ្នាំ មុខរបរទិញលក់ម៉ូតូ រស់នៅភូមិច្រនៀង ឃុំគោកឃ្មុំ ស្រុកថ្មគោល ខេត្តបាត់ដំបង ត្រូវបានជនសង្ស័យបាញ់ស្លាប់នៅនឹងកន្លែងកើតហេតុតែម្ដងនិងទី២ឈ្មោះ រឹទ្ធ អាយុប្រហែល៣០ឆ្នាំ ស្រុកកំណើតខេត្តពោធិ៍សាត់ តែបានមករកស៊ីជាមួយជនឈ្មោះ ហួត ឈឿង។

ប្រភពដដែលបានបន្តថា មុនពេលកើតហេតុ ជនរងគ្រោះទាំងពីរនាក់បានជិះម៉ូតូជាមួយគ្នា លុះពេលទៅដល់ចំណុចកើតហេតុខាងលើ ក៏ត្រូវបានជនសង្ស័យបាញ់ស្លាប់ទាំងពីរនាក់តែម្ដង រួចហើយក៏យកម៉ូតូជនរងគ្រោះ ម៉ាកវ៉េវអាល់ហ្វា ពណ៌ស ជិះរត់គេចខ្លួនដោយសុវត្តិភាព។

បច្ចុប្បន្នសម្ថកិច្ចកំពុងតែស្វែងរកចាប់ខ្លួនជនសង្ស័យដើម្បីមកផ្ដន់ទាទោសតាមច្បាប់ ចំណែកឯសាកសពទាំងពីរនាក់ត្រូវបានក្រុមគ្រួសារយកមកធ្វើបុណ្យតាមប្រពៃណី៕