ពោធិ៍សាត់ៈ លោកអធិការស្រុកក្រគរ បានប្រាប់Post News ថា មានយុវតីម្នាក់ បានស្លាប់បាត់បង់ជីវិតយ៉ាងអាណោចអាធ័ម បន្ទាប់ពីដើរលើខ្នងប្រឡាយហើយក៏ប្រកាច់ធ្លាក់ចូលទៅក្នុងទឹក។

ហេតុការណ៍នេះបានកើតឡើង កាលពីវេលាម៉ោង ១១និង១៥នាទី ថ្ងៃត្រង់ទី៩ ខែកក្កដា ឆ្នាំ២០១៧ ស្ថិតនៅចំណុចប្រឡាយ ក្នុងភូមិសែនពេន ឃុំត្នោតជុំ ស្រុកក្រគរ ខេត្តពោធិ៍សាត់ ដែលទឹកជម្រៅ៤០ ស.ម ។

សាកសពជនរងគ្រោះខាងលើមានឈ្មោះ ឡាន់ គារ៉ា ភេទស្រី អាយុ១៧ឆ្នាំ ស្នាក់នៅភូមិឃុំកើតហេតុខាងលើ ដោយមានឪពុកឈ្មោះ ជុក សារ៉ អាយុ៤៧ឆ្នាំ និងម្តាយឈ្មោះ ឃុន ចាន់ អាយុ៤៣ឆ្នាំ ហើយជនរងគ្រោះមានបងប្អូនបង្កើតចំនួន ៦ នាក់ ក្នុងនោះមានស្រី៤ នាក់ ។

យោងតាមប្រភពព័ត៌មានបានឲ្យដឹងថា មុនពេលកើតហេតុ ជនរងគ្រោះបានមកពីស្ទូងជាមួយអ្នកភូមិ ជិតដល់ផ្ទះហើយអ្នកភូមិក៏បែកគ្នាទៅផ្ទះរៀងៗខ្លួន រីឯជនរងគ្រោះក៏ដើរតាមខ្នងប្រឡាយមកផ្ទះម្នាក់ឯង លុះជិតដល់ផ្ទះចម្ងាយប្រហែល ៨ ម៉ែត្រ ជនរងគ្រោះក៏ប្រកាច់ធ្លាក់ចូលក្នុងទឹកប្រឡាយបណ្តាលឲ្យស្លាប់តែម្តង រហូតដល់ម៉ោងប្រហែល ១២និង៥០នាទី ឈ្មោះ ម៉ន សុខរៀម បានជិះកង់តាមខ្នងប្រឡាយក៏ប្រទះឃើញជនរងគ្រោះបានស្លាប់បាត់ទៅហើយ ។

ក្នុងនោះ បើយោងតាមការបំភ្លឺរបស់ឪពុកម្តាយជនរងគ្រោះ បានឲ្យដឹងថា កូនរបស់ខ្លួនក្រោយពីធ្លាក់ពីលើចុងដូងជាងមួយឆ្នាំមក ទើបរយៈពេល ២ខែនេះ កូនរបស់ខ្លួនតែងមានជំងឺចម្លែកគឺប្រកាច់ ១ដង ទៅ២ដងក្នុង១ខែ៕