ភ្នំពេញ: ដូចការគ្រោងទុកនៅរសៀលថ្ងៃទី១១ ខែកក្កដា ឆ្នាំ២០១៧នេះលោក កោ វណ្ឌី ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស ជនជាប់ចោទទី១ឈ្មោះ ជឹម សុផាន់ណា ភេទប្រុស អាយុ ២៩ឆ្នាំ មុខរបរ កម្មករសំណង់ និងទី២ឈ្មោះ ឈឿន សុខឃីម ភេទប្រុស អាយុ ៣២ឆ្នាំ មុខរបរ កម្មករសំណង់ ដាក់ពន្ធនាគារកំណត់រយ:ពេលអស់មួយជីវិត ពីបទ ឃាតកម្មគិតទុកជាមុន លើជនរងគ្រោះឈ្មោះ ធន់ ចាន់ធឿន ភេទប្រុស អាយុ ៣៣ឆ្នាំ មុខរបរ មេការសំណង់ និងបទ ប្រើប្រាស់នូវសាធាតុញៀនដោយខុសច្បាប់ ប្រព្រឹត្តកាលពីយប់ថ្ងៃទី១៤ ខែមករា ឆ្នាំ២០១៧ នៅចំណុច អាគារ Easton International Apartment កំពុងសាងសង់ ដែលមានលេខ២១-២៣ ភូមិ២ ផ្លូវ៥១ កែងនិង ផ្លូវ២១៤ សង្កាត់បឹងរាំង ខណ្ឌដូនពេញ រាជធានីភ្នំពេញ យោងតាមមាត្រា ២០០នៃក្រមព្រហ្មទណ្ឌ និងមាត្រា ៤៥នៃច្បាប់ស្តីពីការត្រួតពិនិត្យគ្រឿងញៀន។

នៅក្នុងសវនាការ កាលពីរសៀលថ្ងៃទី២៩ ខែមិថុនា ឆ្នាំ២០១៧កន្លងទៅ ជនជាប់ចោទទាំង២នាក់បានទទួលស្គាល់ថាពួកគេពិតជាបានសម្លាប់ជនរងគ្រោះ ដោយរឹតក និងទម្លាក់មកដីពីជាន់លើអគារជាន់ទី៤។ ពួកគេបន្តថា នៅយប់កើតហេតុ ជនរងគ្រោះបានផឹកស្រានិងជក់គ្រឿងញៀនជាមួយពួកខ្លួន ដល់ម៉ោង ជាង១១យប់ លុះដល់ម៉ោងជិត៣ភ្លឺ ពួកគេបានយកខ្សែរឹតកជនរងគ្រោះសម្លាប់តែម្តង និងបានលើកបោះទម្លាក់ពីលើអគារជាន់ទី៤ បង្វែងដានថាជនរងគ្រោះលោតពីលើអគារ។ ដោយខ្លាចមានការសង្ស័យ ពួកបានព្យាយាមដឹកជនរងគ្រោះតាមរម៉កកង់បី ទៅមន្ទីរពេទ្យកាល់ម៉ែត ដើម្បីសង្គ្រោះ និងបំបិទភស្តុតាង ប៉ុន្តែនៅតែនគរបាលចាប់បានដដែល៕

//youtu.be/BcIc5XV33qE