ភ្នំពេញៈ អគ្គិភ័យបានឆាបឆេះផ្ទះមួយកន្លែងបង្កជាផ្សែងខ្មៅបាញ់ឡើងលើនៅសង្កាត់ទទួលស្វាយព្រៃ២ បង្កឲ្យមានការភ្ញាក់ផ្អើលយ៉ាងខ្លាំង។

ហេតុការណ៍នេះបានកើតឡើងនៅវេលាម៉ោង៩និង៣០នាទីព្រឹក ថ្ងៃទី១២ ខែកក្កដា ឆ្នាំ២០១៧ ត្រង់ចំណុចផ្ទះ៧៤C ផ្លូវ៣៨៤ សង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។

ប្រភពព័ត៌មានបានឲ្យដឹងថា ករណីនេះកើតឡើងដោយសារតែម្ចាស់ផ្ទះនោះមានការធ្វេសប្រហែស ដោយគាត់ដាក់កម្ដៅសម្លហើយភ្លេចបិទហ្គាសនិងចាកចេញពីផ្ទះ ទើបបណ្ដាលឲ្យឆេះខ្លោចឆ្នាំងបង្កឲ្យមានផ្សែងខ្មៅបាញ់ឡើងធ្វើឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរនោះនិងសមត្ថកិច្ចបាននាំយករថយន្តពន្លត់អគ្គិភ័យមកចំនួន៣គ្រឿងផងដែរ។

ក្រោយពីមានការអន្តរាគមន៍ពីសមត្ថកិច្ចជំនាញនិងប្រជាពលរដ្ឋ អគ្គិភ័យនោះក៏រលត់ទៅវិញ ដោយពុំបណ្ដាលឲ្យមាន
ការឆាបឆេះទ្រព្យសម្បត្តិអ្វីធំដុំទេ គ្រាន់តែឆេះខ្លោចឆ្នាំងដែលកម្ដៅសម្លនោះតែប៉ុណ្ណោះ ហើយក៏មិនមានការបាញ់ទឹកពន្លត់នោះដែរ៕