តាកែវ: លោកអធិការរងស្រុកបាទីបានប្រាប់ Post News ថា មានករណីស្ត្រីចំណាស់ម្នាក់លង់ទឹកស្លាប់។

ហេតុការណ៍នេះបានកើតឡើងនៅវេលាម៉ោង៤និង១៥នាទីល្ងាច ថ្ងៃទី១០ ខែកក្កដា ឆ្នាំ២០១៧ ត្រង់ចំណុចអាងទឹកពងដំរីខាងកើតឈៀងខាងជើងភូមិត្រពាំងត្រាវចម្ងាយ១៥០០ម៉ែត្រ។

ជនរងគ្រោះមានឈ្មោះ តិ ឆែត ភេទស្រី អាយុ៥៦ឆ្នាំ រស់នៅភូមិត្រពាំងត្រាវ ឃុំពត់សរ ស្រុកបាទី ខេត្តតាកែវ។

ប្រភពព័ត៌មានបានឲ្យដឹងថា ជនរងគ្រោះបានទៅដកក្រឳឈូកនៅក្នុងបឹងពងដំរី ហើយក្រុមគ្រួសារមិនឃើញត្រឡប់មកផ្ទះវិញក៏ដើររក ហើយប្រទះឃើញជនរងគ្រោះលង់ទឹកស្លាប់នៅកន្លែងកើតហេតុខាងលើ។ ភ្លាមៗនោះបងប្អូនសាច់ញាតិក៏បានរាយការណ៍ប្រាប់សមត្ថកិច្ចផងដែរ។

ក្រោយពេលពិនិត្យរួច សាកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕