ព័ត៌មានជាតិ

អ៊ីស៊ុយស៊ុយពន្លះគូបូតាពេញទំហឹង បណ្ដាលឲ្យជនរងគ្រោះម្នាក់ស្លាប់បាត់បង់ជីវិត!

ពោធិ៍សាត់: លោកអធិការស្រុកភ្នំក្រវាញបានប្រាប់ Post News ថា មានករណីគ្រោះថ្នាក់ចររាចរណ៍មួយបានកើតឡើងរវាងរថយន្តអ៊ីស៊ុយស៊ុយបុកគោយន្ត បណ្ដាលឲ្យបុរសម្នាក់ស្លាប់បាត់បង់ជីវិត។

ហេតុការណ៍នេះបានកើតឡើងនៅវេលាម៉ោង៨និង២០នាទីយប់ នាថ្ងៃទី១១ ខែកក្កដា ឆ្នាំ២០១៧ ត្រង់ចំណុចស្ពានដំណាក់ឈើក្រម លើផ្លូវលេខ៥៥ ស្ថិតនៅភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។

ប្រភពព័ត៌បានឲ្យដឹងថា រថយន្តដែលបង្កហេតុគឺបានទៅបុកគោយន្តមួយគ្រឿងម៉ាកគូបូតា ពណ៌ក្រហម បើកបរពីលិចទៅកើត មានគ្នា២នាក់ អ្នកបើកគោយន្តឈ្មោះ ឌី ឌឿន ភេទប្រុស អាយុ៣៥ឆ្នាំ មុខរបរកសិករ រស់នៅភូមិអូរំចេក ឃុំត្រពាំងជង ស្រុកបាកាន ខេត្តពោធិ៍សាត់ (បានស្លាប់នៅពាក់កណ្តាលផ្លូវ ម្តុំភូមិក្រញ៉ាំ ឃុំផ្ទះរុង ពេលបញ្ជូនទៅមន្ទីរពេទ្យបាកាន)។ ចំណែកអ្នករួមដំណើរម្នាក់ទៀតមានឈ្មោះ ឌី ដន ភេទប្រុស អាយុ២៩ឆ្នាំ មុខរបរកសិករ រស់នៅភូមិព្រៃកន្ទួត ឃុំតាលោ ស្រុកបាកាន ខេត្តពោធិ៍សាត់ (មិនមានរបួស)។

ប្រភពព័ត៌មានដដែលបានឲ្យដឹងថា គ្រោះថ្នាក់ចររាចរណ៍ខាងលើនេះគឺបណ្តាលមកពីអ្នកបើកបររថយន្តធ្វើការបើកបរដោយមិនប្រកាន់ស្តាំ ទើបបានបណ្តាលឲ្យជ្រុលទៅបុកជាមួយគោយន្តយ៉ាងដូច្នេះ។ រថយន្តបង្កម៉ាក អ៊ីស៊ុយស៊ុយ ពណ៌ស្លែ (មួយបាំងកន្លះ ចង្កូតស្ដាំ) ពាក់ស្លាកលេខ បន្ទាយមានជ័យ 2A-1931 ជាប្រភេទរថយន្តឈ្នួល ពីពោធិ៍សាត់ទៅស្រុកវាលវែង បើកបរពីកើតទៅលិច អ្នកបើកបររថយន្តមិនស្គាល់អត្តសញ្ញាណ បានរត់គេចខ្លួនបាត់ ដោយទុករថយន្តនៅកន្លែងកើតហេតុ។

ក្រោយពីក្រុមសមត្ថកិច្ចបានធ្វើការវាស់វែងរួចហើយ រថយន្ត និងគោយន្តក៏ត្រូវបានយកមករក្សារទុកនៅផ្នែកសណ្តាប់ធ្នាប់នៃអធិការនគរបាលស្រុកភ្នំក្រវាញ ដើម្បីរងចាំការដោះស្រាយ៕

មតិយោបល់