ភ្នំពេញ: ទីតាំងហ្គេមបាញ់ត្រី មួយកន្លែងនៅខាងក្រោយប៉ុស្តិ៍ទួលសង្កែ ត្រូវបានកម្លាំងសមត្ថកិច្ចនៃអធិការដ្ឋាននគរបាលខណ្ឌឫស្សីកែវ ធ្វើការឆ្មក់ចូលបង្ក្រាប ដោយឃាត់ខ្លួនជនសង្ស័យ២នាក់ និងដកហូតទូហ្គេមបាញ់ត្រីចំនួនមួយទូ។

ប្រតិបត្តិការក្នុងបង្ក្រាបទីតាំងខាងលើនេះ ធ្វើឡើងកាលពីវេលាម៉ោង ៣ល្ងាច ថ្ងៃទី១២ ខែកក្កដា ឆ្នាំ២០១៧ ដែលនៅត្រង់តំបន់មិនមានរៀបរយ នៅខាងក្រោយប៉ុស្តិ៍ទួលសង្កែ ស្ថិតក្នុងក្រុម១៤ ភូមិផ្សារតូច សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានប្រាប់ឲ្យដឹងថា ជនសង្ស័យដែលឃាត់ខាងលើនេះ ទី១-ឈ្មោះ សេង ប៉ូរ៉ាវី ភេទប្រុស អាយុ ២៨ឆ្នាំ មុខរបរ លក់បាយ ស្នាក់នៅផ្ទះលេខ១៨A2 ផ្លូវលេខ៦០ ភូមិផ្សារតូច សង្កាត់ទួលសង្កែ ខណ្ឌឫស្សីកែវ និងទី២-ឈ្មោះ ម៉ាត់ វី ភេទប្រុស អាយុ ២០ឆ្នាំ មុខរបរ នៅផ្ទះ ស្នាក់នៅផ្ទះគ្មានលេខ តាមបណ្តោយផ្លូវជាតិលេខ៥ ភូមិ១ សង្កាត់ច្រាំងចំរេះ១ ខណ្ឌឫស្សីកែវ។

សមត្ថកិច្ចបានបន្តទៀតថា នៅក្នុងប្រតិបត្តិការខាងលើនេះ ដោយសារតែមានការរាយកាណ៍ពីប្រជាពលរដ្ឋ ហើយសមត្ថកិច្ចយើងបានចុះធ្វើការស្រាវជ្រាវ និងកំណត់ទីតាំងបាន ក៏ធ្វើការឆ្មក់ចុះបង្ក្រាបទីតាំងខាងលើ ដោយពេលចុះបង្ក្រាបនេះ សមត្ថកិច្ចយើងបានឃាត់ខ្លួនជនសង្ស័យ ២នាក់ ព្រមទាំងដកហូតទូហ្គេមបាញ់ត្រី ១ទូ និងសៀវភៅសម្រាប់កត់ពុងចំនួន ១ក្បាល។ ក្រោយមក សមត្ថកិច្ចយើងបាននាំខ្លួនជនសង្ស័យទាំង ២នាក់ខាងលើ មកកាន់ប៉ុស្តិ៍នគរបាលទួលសង្កែ ដើម្បីសាកសួរ។

បច្ចុប្បន្នជនសង្ស័យទាំង ២នាក់ខាងលើ ត្រូវបានសមត្ថកិច្ចប៉ុស្តិ៍ទួលសង្កែ បញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕