ភ្នំពេញៈ កាលពីរសៀលថ្ងៃទី១៣ ខែកក្កដា ឆ្នាំ២០១៧ ម្សិលមិញ លោក លឹម មករន្ទ ចៅក្រមជំនុំជម្រះនៃសាលាដំបូងរាជធានីភ្នំពេញ បានប្រកាសសាលក្រមផ្ទន្តាទោស ជនជាប់ចោទទី១ឈ្មោះ Anderw Jonh Sloman ហៅ Andy ភេទប្រុស អាយុ ៥២ឆ្នាំ ជនជាតិអង់គ្លេស ដាក់ពន្ធនាគារកំណត់រយៈពេល ៣ឆ្នាំ និងពិន័យជាប្រាក់ចំនួន ៦លានរៀលចូលជាថវិការដ្ឋ និងជនជាប់ចោទទី២ឈ្មោះ ឆាង ស្រីភ័ក្រ ភេទស្រី អាយុ ២៨ឆ្នាំ ជនជាតិខ្មែរ ដាក់ពន្ធនាគារកំណត់រយៈពេល ២ ឆ្នាំកន្លះ និងពិន័យជាប្រាក់ចំនួន ៤លានរៀល ចូលជាថវិការដ្ឋ ក្រោមបទចោទប្រកាន់ពីបទ ជួញដូរដោយខុសច្បាប់នូវសារធាតុញៀន ប្រភេទម៉ាទឹកកកចំនួន ១,៤១ក្រាម ប្រព្រឹត្តនៅថ្ងៃទី៨ ខែតុលា ឆ្នាំ២០១៦ នៅចំណុចផ្ទះសំណាក់ផ្កាយ៩ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ តាមមាត្រា ៤០នៃច្បាប់ស្តីពី ការត្រួតពិនិត្យគ្រឿងញៀន។

នៅក្នុងសវនាការកាលពីរសៀលថ្ងៃទី១១ ខែកក្កដា ឆ្នាំ២០១៧ ជនជាប់ចោទឈ្មោះ ឆាង ស្រីភ័ក្រ ឆ្លើយថា ខ្លួនបានយកគ្រឿងញៀនចំនួន ៣ដងពីឈ្មោះ Andy យកទៅលក់ឲ្យភ្ញៀវដោយទទួលបានលុយ ១០ ទៅ១៥ដុល្លារ និងបានរបស់របរប្រើប្រាស់ខ្លះៗពីឈ្មោះ Andy រួមទាំងបានដេកជាមួយបុរសម្នាក់នេះផងដែរ។ ជនជាប់ចោទថា ពួកខ្លួនបានប្រើប្រាស់គ្រឿងញៀនជាមួយគ្នា និងប្រើប្រាស់ថ្នាំសម្រើបមុនពេលរួមភេទទៀតផង។ ជនជាប់ចោទបញ្ជាក់ថា នៅថ្ងៃកើតហេតុ ឈ្មោះ Andy បានឱ្យខ្លួនយកគ្រឿងញៀនចំនួន ២,៥ហ៊ុន (១,៤១ក្រាម) ទៅឱ្យស្ត្រីម្នាក់ ក្នុងតម្លៃ ៥៥ដុល្លារ នៅពេលយកទៅដល់ក៏ត្រូវនគរបាលចាប់តែម្តង។

ជនជាប់ចោទឈ្មោះ Andy បដិសេធថា ខ្លួនមិនបានប្រព្រឹត្តដូចការចោទប្រកាន់របស់តុលាការទេ ហើយខ្លួនក៏មិនបានប្រើឈ្មោះ ឆាង ស្រីភ័ក្រ ឱ្យលក់គ្រឿងញៀននោះទេ គឺគ្រាន់តែទិញមកប្រើប្រាស់តែប៉ុណ្ណោះ៕

https://youtu.be/azXHu5CDrXQ