ភ្នំពេញៈ គ្រោះថ្នាក់ចរាចរណ៍មួយបានកើតឡើងបន្ទាប់ពីបុរស៣នាក់ ជិះម៉ូតូម៉ាកគុបជ្រុង១គ្រឿង ក្នុងល្បឿនលឿនជ្រុលទៅបុកជាមួយរថយន្តឡង់គ្រីស័រស៊េរីទំនើប ដែលមានអង្គរក្សជាអ្នកបើក និងស្ត្រីម្នាក់អង្គុយខាងក្រោយពេញទំហឹងបណ្តាលឲ្យអ្នកជិះម៉ូតូទាំង៣នាក់ ហោះផ្លោង រងរបួសធ្ងន់ ចំណែកម៉ូតូនិងរថយន្តរងការខូចខាតយ៉ាងដំណំ។

ហេតុការណ៍នេះបានកើតឡើងនៅវេលាម៉ោង១១យប់ថ្ងៃទី១៤ ខែកក្កដា ឆ្នាំ២០១៧ ស្ថិតនៅចំណុចស្តុប ម៉ុងឬទ្ធី កែងនិងផ្លូវហាណូយ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះទាំង៣នាក់ មិនទាន់ស្គាល់អត្តសញ្ញាណនោះទេ ជិះម៉ូតូម៉ាកគុបជ្រុង ពណ៌ទឹកប៊ិច ពាក់ស្លាកលេខ 1C-5684។ ចំណែករថយន្តម៉ាក ឡង់គ្រីស័រ ពណ៌ខ្មៅ ពាក់ស្លាកលេខ ភ្នំពេញ 2J-6066 បើកបរដោយបុរសម្នាក់ជាអង្គរក្ស រួមនិងដំណើរដោយស្ត្រីម្នាក់អង្គុយពីក្រោយ។

តាមប្រភពពីកន្លែងកើតហេតុបានឲ្យដឹងថា មុនដំបូងគេឃើញរថយន្តបើកតាមបណ្តោយផ្លូវឧកញ៉ា ម៉ុងឬទ្ធី ទិសដៅពីលិចទៅកើត រីឯម៉ូតូជិះតាមបណ្តោយផ្លូវ ហាណូយ ទិសដៅពីត្បូងទៅជើង ខណៈមកដល់ចំណុចកន្លែងស្តុប ទាំងរថយន្តទាំងម៉ូតូមិនបន្ថយល្បឿនដូចគ្នា ជាហេតុម៉ូតូទៅបុកចំក្បាលរថយន្តខាងស្តាំពេញទំហឹងបណ្តាលឲ្យមនុស្សនិងម៉ូតូខ្ទាតទៅខាងផ្លូវបណ្តាលឲ្យជនរងគ្រោះទាំង៣នាក់ មាន២នាក់ធ្ងន់ ម្នាក់ដង្ហើមចង្រិត។

ក្រោយកើតហេតុភ្លាម សមត្ថកិច្ចនគរបាលដែលប្រចាំការគោលដៅស្តុបបានឃាត់រថយន្តជាប់ និងឃាត់ខ្លួនអ្នកបើកបរទៅខណ្ឌ ទុកប្រគល់ឲ្យជំនាញចរាចរណ៍ក្រុង យកទៅការិយាល័យ។

ចំណែកជនរងគ្រោះត្រូវបានសាម៊ុយគ្លីនិកឯកជន ពន្លឺមកដឹកទៅសង្គ្រោះបន្ទាន់នៅមន្ទីរពេទ្យ។ រីឯស្ត្រីម្នាក់នៅក្នុងរថយន្ត គឺមានរថយន្តបាឡែន១គ្រឿងទៀត មកយកទៅផ្ទះ ។ ក្នុងនោះមធ្យោបាយធ្វើដំណើរទាំង២គ្រឿងត្រូវបាននគរបាលជំនាញចរាចរណ៍ក្រុងវាស់វែងធ្វើកំណត់ហេតុយកទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំការដោះស្រាយនៅពេលក្រោយបន្តទៀត៕