បាត់ដំបង: កម្លាំងអធិការដ្ឋាននគរបាលស្រុកបាណន់ បានធ្វើការឃាត់ខ្លួនជនសង្ស័យម្នាក់ពីបទកាន់កាប់អាវុធដោយខុសច្បាប់។

ប្រតិបត្តិការនេះបានធ្វើឡើងនៅវេលាម៉ោង៩និង៣៥នាទី ថ្ងៃទី១៤ ខែកក្កដា ឆ្នាំ២០១៧ នៅចំណុចដើមត្រាងភូមិបបុះ ឃុំឈើទាល ស្រុកបាណន់ ខេត្តបាត់ដំបង។

ជនសង្ស័យមានឈ្មោះ មុត សុខា អាយុ៥៤ឆ្នាំ ភេទប្រុស អតីតធ្លាប់ធ្វើជាយោធានៅវរ:សេនាតូចលេខ៣ ប្រចាំការនៅរូងភូមិចង្ហូរស្វាយ ឃុំចែងមានជ័យ មានទីលំនៅមិនប្រាកដ ( ធ្លាប់ស្នាក់នៅចំណុចអូរអង្គញ់ ភូមិកំពង់គល់ ឃុំចែងមានជ័យ ) ព្រមទាំងដកហូតបានអាវុធAKបត់រលុបលេខ១ដើម បង់១គ្មានគ្រាប់ ដែលឈ្មោះនេះថាជីកកំណប់នៅអូរអាចយ ស្រុកសំឡូត បានប្រទះឃើញ ហើយក៏ដាក់យកតាមខ្លួនរហូត គោលបំណងយកទៅដូរអង្ករហូប។

ជនសង្ស័យនោះបានមកសុំផ្ទះអ្នកស្រុកទីនោះស្នាក់នៅដើម្បីរកស៊ីឈ្នួលកាច់ពោតដោយនាំប្រពន្ធ និងកូនចំនួន៥នាក់ (ស្រី២) មកជាមួយផង នៅចំណុចឃាត់ខាងលើ។

បច្ចុប្បន្នកម្លាំងអធិការនគរបាលស្រុកបានកំពុងកសាងសំណុំរឿងបញ្ជូនទៅតុលាការខេត្តបាត់ដំបង ដើម្បីធ្វើការសាកសួរបន្ថែម៕