ភ្នំពេញៈ លោកទេសរដ្ឋមន្ត្រី ស៊ុន ចាន់ថុល បានទទួលជួបសម្ដែងការគួរសមពីលោក Bill Longhurst ឯកអគ្គរាជទូតចក្រភពអង់គ្លេស ប្រចាំនៅកម្ពុជា អមដំណើរដោយលោក Cashel Gleeson អនុប្រធានបេសកកម្មអមស្ថានទូត ចក្រភពអង់គ្លេស កាលពីថ្ងៃទី២៥ ខែឧសភា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន។

លោក Longhurst បានសម្តែងនូវការកោតសរសើររបស់ខ្លួន ចំពោះទំនាក់ទំនងដ៏ល្អរវាងកម្ពុជា និងចក្រភពអង់គ្លេស និងបានឆ្លៀតឱកាស សម្តែងនូវការអបអរសាទរផងដែរ ចំពោះលោកទេសរដ្ឋមន្រ្តី ដែលបានទទួលការតែងតាំងថ្មី ជារដ្ឋមន្រ្តីក្រសួងសាធារណការ និងដឹកជញ្ជូន។

លោកឯកអគ្គរដ្ឋទូត បានណែនាំឲ្យលោកទេសរដ្ឋមន្ត្រី បានស្គាល់លោក Cashel Gleeson ជាអនុប្រធានបេសកកម្មអមស្ថានទូតចក្រភពអង់គ្លេស ប្រចាំនៅកម្ពុជា ដែលទើបទទួលការតែងតាំងថ្មី និងបានស្នើសុំយោបល់ពី លោកទេសរដ្ឋមន្រ្តី អំពីគម្រោងហេដ្ឋារចនាសម្ព័ន្ធ ទាក់ទងនឹងការដឹកជញ្ជូន ដែលមានសក្កានុពល សម្រាប់ក្រុមហ៊ុនអង់គ្លេស មកធ្វើការវិនិយោគ។

លោកទេសរដ្ឋមន្ត្រី បានសម្តែងនូវអំណរគុណយ៉ាងជ្រាលជ្រៅ និងការកោតសរសើរដោយស្មោះ ចំពោះកិច្ចសហប្រតិបត្តិការ និងការគាំទ្រជាបន្តរវាងប្រទេសកម្ពុជា និងចក្រភពអង់គ្លេស៕