(ត្បូងឃ្មុំ)៖ ព្រោះតែបើកបរម៉ូតូមិនបានពាក់មួកសុវត្ថិភាព និងបត់ឆ្វេងឆ្លងកាត់ថ្នល់ខ្វះការប្រុងប្រយ័ត្ន ត្រូវម៉ូតូធនធំ១គ្រឿងប្រើប្រាស់ល្បឿនលឿនដែរនោះ បើកបុកពីក្រោយ បណ្តាលឲ្យស្ត្រីម្នាក់ស្លាប់បាត់បង់ជីវិត ភ្លាមៗនៅកន្លែងកើតហេតុ និងមនុស្ស២នាក់ទៀតរងរបួសធ្ងន់និងស្រាល ត្រូវបានគេបញ្ជូនទៅសង្គ្រោះនៅមន្ទីរពេទ្យ ។
ឧបទ្ទវហេតុនេះបានកើតឡើងកាលពីវេលាម៉ោង៣និង៣០នាទីរសៀល ថ្ងៃទី៦ មេសា ២០១៦ នៅលើកំណាត់ផ្លូវជាតិលេខ១១ ស្ថិតក្នុងភូមិចង្វា ឃុំអំពិលតាពក ស្រុកអូររាំងឪ ខេត្តត្បូងឃ្មុំ ។
មន្ត្រីនគរបាលចរាចរណ៍បានឲ្យដឹងថា នៅមុនពេលកើតហេតុគេបានឃើញ បុរសចំណាស់ម្នាក់ឈ្មោះទេស ឡេត អាយុ៦៩ឆ្នាំ មានទីលំនៅភូមិស្វាយតាធម្ម ឃុំអំពិលតាពក ស្រុកអូររាំងឪ បានបើកបរម៉ូតូ១គ្រឿងម៉ាកC125 ពណ៌ខ្មៅ ពាក់ស្លាកលេខ ភ្នំពេញ 1BM.3853 ឌុបប្រពន្ធម្នាក់ឈ្មោះសាយ ហ៊ាង អាយុ៦០ឆ្នាំ ទិសដៅពីជើងទៅត្បូង លុះមកដល់ត្រង់ចំណុចកើតហេតុ ក៏បានបត់ឆ្វេង ស្រាប់តែមានម៉ូតូ១គ្រឿងម៉ាកCBR ពណ៌ក្រហម គ្មានស្លាកលេខ បើកបរដោយបុរសម្នាក់ឈ្មោះម៉េង វណ្ណដា អាយុ២១ឆ្នាំ មានទីលំនៅភូមិមេបុណ្យ ឃុំមេបុណ្យ ស្រុកស្វាយអន្ទរ ខេត្តព្រៃវែង ដែលបើកបរស្របទិសគ្នា ដោយប្រើប្រាស់ល្បឿនលឿនផងនោះ ក៏បានបុកពីក្រោយបណ្ដាលឲ្យស្ត្រីឈ្មោះសាយ ហ៊ាង ស្លាប់បាត់បង់ជីវិតនៅកន្លែងកើតហេតុ និងបុរសជាប្ដីឈ្មោះទេស ឡេត រងរបួសស្រាល ចំណែកឯបុរសបើកបរម៉ូតូCBR រងរបួសធ្ងន់ធ្ងរផងដែរ ។
ក្រោយពីកើតហេតុ កម្លាំងជំនាញនគរបាលចរាចរណ៍បានចុះទៅជួយអន្តរាគមន៍ បញ្ជូនជនរងគ្រោះទៅកាន់មន្ទីរពេទ្យ និងប្រគល់សាកសពអ្នកស្លាប់ឲ្យសាច់ញាតិយកទៅធ្វើបុណ្យតាមប្រពៃណី ចំណែកម៉ូតូទាំង២គ្រឿង ត្រូវយកទៅរក្សាទុកនៅអធិការដ្ឋាននគរបាលស្រុកអូររាំងឪ ដើម្បីរង់ចាំដោះស្រាយតាមនិតិវិធីច្បាប់៕
មតិយោបល់