ភ្នំពេញ: រថយន្តសាំយ៉ុង បានបើកបុកគ្នាជាមួយនឹងរថយន្តតូយ៉ូតាព្រុស មួយគ្រឿងពេញទំហឹង បណ្ដាលឲ្យរងការខូចខាត និងបង្កឲ្យមានការភ្ញាក់ផ្អើលដល់ប្រជាពលរដ្ឋយ៉ាងខ្លាំង។

ហេតុការណ៍នេះបានកើតឡើងកាលពីវេលាម៉ោង១២ និង៣០នាទី រំលងអធ្រាត្រ ឈានចូលថ្ងៃទី១៨ ខែកក្កដា ឆ្នាំ២០១៧ នៅក្បែរង្វង់មូលគួចកាណុង តាមបណ្ដោយផ្លូវលេខ៤៧ កែងនិងផ្លូវលេខ៧៤ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើ បានប្រាប់ឲ្យដឹងថា នៅមុនពេលកើតហេតុ គេឃើញមានយុវជន២នាក់បានធ្វើដំណើរួមគ្នាក្នុងរថយន្តមួយគ្រឿងម៉ាកតូយ៉ូតាព្រុស ពណ៌ស ពាក់ស្លាកលេខ ភ្នំពេញ 2AC-9805 ដោយបានបើករថយន្តមកពីផ្លូវព្រះមុន្នីវង្ស បំណងឡើងស្ពានជ្រោយចង្វារទៅត្រើយខាងកើត ខណ:មកដល់ចំណុចកើតហេតុខាងលើ ក៏ត្រូវបានរថយន្តស៊ាំយ៉ុង ពណ៌ស បិតតែមខៀវ ពាក់ស្លាកលេខភ្នំពេញ 2AC-9805 បានបើកបរតាមបណ្ដោយផ្លូវលេខ៤៧ ទិសដៅពីត្បូងមកជើងក្នុងល្បឿនយ៉ាងលឿនដូចហោះ ហើយមិនប្រយ័ត្ននិងជាន់ហ្វ្រាំងមិនទាន់ ក៏ជ្រុលចង្កូតទៅបុករថយន្តព្រុសពីចំចំហៀងខាងមុខពេញទំហឹង បណ្ដាលឲ្យផ្លោងទៅឡើងលើឃឿនសួនច្បាររងការខូចខាតរថយន្តទាំង២គ្រឿងយ៉ាងដំណំ ។

ក្រោយពេលកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុ ដោយឃើញរថយន្តទាំង២គ្រឿង បានបង្កឲ្យខូចខាតឃឿនសួនច្បារដែលជាសម្បត្តិរដ្ឋ ទើបទំនាក់ទំនងទៅជំនាញចរាចរណ៍ក្រុងឲ្យមកចុះធ្វើការវាស់វែង យករថយន្តទាំង២គ្រឿងខាងលើ យកទៅរក្សាទុកនៅការិយាល័យចរាចរណ៍ជើងគោក ស្នងការដ្ឋាននគរបាលរាជធានីភ្នំពេញ រង់ចាំភាគីទាំង២ចូលខ្លួនដោះស្រាយតាមផ្លូវច្បាប់តែម្តង ៕