បន្ទាយមានជ័យៈ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តក្រុមហ៊ុនផ្លូវដែក មួយគ្រឿង បានបុកជាមួយនឹងរថយន្តម៉ាក ហាយលែនឌ័រមួយគ្រឿងទៀតពេញទំហឹង បណ្តាលឲ្យមនុស្សចំនួន២នាក់ រងរបួសធ្ងន់និងស្រាល។

ហេតុការណ៍នេះកើតឡើងកាលពីល្ងាច ថ្ងៃទី១៧ ខែកក្កដា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៥ ត្រង់ចំណុចផ្លូវបំបែកជា៤ ស្ថិតក្នុងភូមិថ្នល់បត់ ឃុំភ្នំតូច ស្រុកមង្គលបូរី ខេត្តបន្ទាយមានជ័យ។

លោកវរសេនីយ៍ត្រី រស់ សំបូរ មេបញ្ជាការមូលដ្ឋានកងរាជអាវុធហត្ថស្រុកមង្គលបូរី បានឲ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្ត១គ្រឿងម៉ាក KIA ពណ៌លឿង ពាក់ស្លាកលេខ ភ្នំពេញ 2AM-0898 បើកបរដោយឈ្មោះ ហ៊ីង ធួន ភេទប្រុស អាយុ៣២ឆ្នាំបម្រើការនៅក្រុមហ៊ុនផ្លូវដែក បើកក្នុងទិសដៅពីត្បូងទៅជើងក្នុងល្បឿនលឿន លុះដល់ចំណុចកើតហេតុបានបត់ឆ្វេងចូលទៅក្នុងភូមិថ្នល់បត់ ស្របពេលនោះក៏មានរថយន្តម៉ាក ហាយលែនឌ័រ ពណ៌ស ពាក់ស្លាកលេខ បាត់ដំបង 2B-1285 បើកបរដោយឈ្មោះ លី ណាសា ភេទប្រុស អាយុ២៨ឆ្នាំ រស់នៅភូមិនរា ឃុំនរា ស្រុកសង្កែ ខេត្តបាត់ដំបង បានមកដល់ក៏បុកគ្នាពេញទំហឹងតែម្តង។

នៅក្នុងក៏បានបណ្តាលឲ្យមនុស្សចំនួន២នាក់ របួសទី១ឈ្មោះ លី ណាសា របួសធ្ងន់បាក់ឆ្អឹងភ្លៅខាងស្តាំ ក្រោយពីកើតហេតុរួច ត្រូវបានសមត្ថកិច្ចជួយដឹកយកទៅសង្គ្រោះបន្ទាន់នៅមន្ទីរពេទ្យខេត្តបាត់ដំបង និងទី២ឈ្មោះ ហ៊ីង ធួន របួសស្រាល ត្រូវបានសមត្ថកិច្ចជួយដឹកយកទៅសម្រាកព្យាបាលនៅមន្ទីរពេទ្យបង្អែកមិត្តភាពកម្ពុជា ជប៉ុន មង្គលបូរី ស្រុកមង្គលបូរី។

បច្ចុប្បន្នរថយន្តទាំង២គ្រឿងត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកមង្គលបូរី ដើម្បីដោះស្រាយទៅតាមនិតិវិធីច្បាប់បន្តទៀត៕