ភ្នំពេញៈ រថយន្តមួយគ្រឿងបានបើកយ៉ាងលឿន ហើយឡើងមកលើចញ្ចើមផ្លូវតម្រង់មកបុកទាំងកំរោលរួមទាំងកិនម៉ូតូអូសជាង៥០ម៉ែត្រ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៧និង៥០នាទីយប់ ថ្ងៃទី១៩ ខែកក្កដា ឆ្នាំ២០១៧ នៅចំណុចមុខធានាគារអេស៊ីលីដា តាមបណ្ដោយផ្លូវ២១៧ ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
បើតាមប្រភពព័ត៌មានពីសម្ដីយុវជនរងគ្រោះទាំង២នាក់ បានប្រាប់ឲ្យដឹងថា នៅមុនពេលកើតហេតុពួកគេបានចេញពីធ្វើការ ហើយនាំគ្នាមកអង្គុយលើម៉ូតូនិយាយគ្នាលេងលើចញ្ចើមផ្លូវក្បែរកន្លែងកើតហេតុ ខណៈពេលនោះស្រាប់តែមានរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3D-2551 បានបើកបរតាមបណ្ដោយផ្លូវ២១៧(ហៅផ្លូវចំការដូង) ទិសដៅពីត្បូងមកជើងក្នុងល្បឿនយ៉ាងលឿន ហើយបានវ៉ារថយន្តមួយគ្រឿង ដោយវ៉ាពីខាងស្ដាំ រួចក៏រេចង្កូតមកបុកម៉ូតូម៉ាកគុបមូល គ្មានស្លាកលេខ ដែលពួកគេកំពុងតែអង្គុយលើ ទាំងកំរោលតែម្ដង ធ្វើឲ្យពួកគេទាំង២ភ័យរត់ចេញពីម៉ូតូយ៉ាងប្រញ៉ាប់ប្រញ៉ាល់ និងបណ្ដាលឲ្យម៉ូតូគៀបជាប់ក្រោមរថយន្តអូសជាង៥០ម៉ែត្រ ទើបឈប់ ហើយអ្នកបើកបរបានចុះគេចខ្លួនបាត់ស្រមោលតែម្ដង ព្រោះទំនងជាភ័យខ្លាចថាបុកគេឲ្យរបួស ឬស្លាប់។
ក្រោយពេលកើតហេតុ យុវជនទាំង២នាក់មិនបានរងរបួសនោះទេ ហើយបានទំនាក់ទំនងទៅសមត្ថកិច្ចមូលដ្ឋានឲ្យចុះមកជួយអន្តរាគមន៍ដល់កន្លែងកើតហេតុ។
មួយសន្ទុះក្រោយមកក៏ស្រាប់តែមានតំណាងខាងរថយន្តបង្កលេចមុខមកចរចារគ្នាជាមួយជនរងគ្រោះ ហើយព្រមសងការខូចខាតទៅលើម្ចាស់ម៉ូតូចំនួន១០០ដុល្លា និងថែមលុយអឺរ៉ូចំនួន២០អឺរ៉ូ ដើម្បីបញ្ចប់រឿងនៅនិងកន្លែងកើតហេតុដោយមិនចង់រំខានដល់សមត្ថកិច្ច៕
មតិយោបល់