កណ្តាលៈ ករណីគ្រោះថ្នាក់ចរាចរណ៍ រវាងបុរសម្នាក់ជិះម៉ូតូទៅបុកគោពេញទំហឹង បណ្ដាលឲ្យស្លាប់នៅនឹងកន្លែង។
ហេតុការណ៍កើតឡើងនៅវេលាម៉ោង៣ និង៣០នាទីរសៀល ថ្ងៃទី២០ ខែកក្កដា ឆ្នាំ២០១៧ នៅលើផ្លូវជាតិលេខ៣ គីឡូម៉ែត្រលេខ៣០-៣១ នៅភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញមានម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ 1W.1269 ជិះដោយឈ្មោះ ហ៊ាន សត់ ភេទប្រុស អាយុ២៥ឆ្នាំ ស្នាក់នៅភូមិរវាង ឃុំតាំងដូង ស្រុកបាទី ខេត្តតាកែវ ក្នុងទិសដៅពីត្បូងមកជើង តាកែវមកភ្នំពេញ បានបុកគោញី ពណ៌ស បាក់ជើង២ខាងក្រោយ (មិនស្គាល់ម្ចាស់)ដើរឆ្លងផ្លូវពីកើតមកលិច បណ្តាលឲ្យស្លាប់នៅកន្លែងកើតហេតុ។

ក្រោយពេលកើតហេតុ ម៉ូតូនិងគោ កម្លាំងជំនាញបានយកមករក្សារទុកនៅអធិការដ្ឋាន ចំណែកសាកសពកម្លាំងជំនាញបានប្រគល់ជូនសាច់ញាតិបងប្អូនយកទៅធ្វើបុណ្យតាមប្រពៃណី៕