ឧត្តរមានជ័យៈ បុរសម្នាក់ស្លាប់ និងរងរបួសធ្ងន់២នាក់ ក្នុងហេតុការណ៍ជួបគ្រោះថ្នាក់ចរាចរណ៍ ម៉ូតូ២គ្រឿងបុកគ្នាពេញទំហឹងលាន់ដូចរន្ទះ កាលពីវេលាម៉ោង៣និង១៥នាទី ថ្ងៃទី២៦ ខែឧសភា ឆ្នាំ២០១៦ ស្ថិតនៅលើកំណាត់ផ្លូវជាតិលេខ RP១៧៤ ទល់មុខអាហារដ្ឋានយីហោ (តាគីមខ្យងអាំង)ស្ថិតក្នុងភូមិទួលគ្រួស ឃុំថ្លាត ស្រុកអន្លង់វែង ខេត្តឧត្តរមានជ័យ។
សេចក្ដីរាយការណ៍ បានឲ្យដឹងថា ជនរងគ្រោះអ្នកបើកបរម៉ូតូធំ ឈ្មោះ ថាត ទិត្យា ភេទប្រុស អាយុ១៩ឆ្នាំរស់នៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ម៉ូតូម៉ាកឌួក(បណ្តាលឲ្យរងរបួសធ្ងន់ បាក់ថ្គាមខាងឆ្វេង ) អ្នករួមដំណើរដែលស្លាប់ ឈ្មោះ លុន ថុណា ភេទប្រុស អាយុ១៩ឆ្នាំ រស់នៅក្នុងភូមិកណ្តាលលើ ឃុំអន្លង់វែង ស្រុកអន្លង់វែង ខេត្តឧត្តរមានជ័យ។ អ្នករងរបួសធ្ងន់ម្នាក់ទៀតឈ្មោះ តា គីម ជាម្ចាស់អាហាដ្ឋានខាងលើបើកបរម៉ូតូម៉ាក វេវ ពណ៌ខ្មៅ អត់ស្លាកលេខ។
សាក្សីនៅកន្លែងកើតហេតុ បានឲ្យដឹងថា ម៉ូតូទាំងពីរខាងលើបានបើកបរស្របទិសគ្នាដោយម៉ូតូម៉ាកឌួក បើកពីខាងក្រោយម៉ូតូវេវ បោះពួយយ៉ាងលឿនពីលិចទៅកើតពេលមកដល់ចំណុចកើតហេតុម៉ូតូម៉ាកវេវ បានបត់ចូលអាហារដ្ឋាន របស់ខ្លួនស្របពេលម៉ូតូម៉ាកឌូក ដែលជិះគ្នាពីរនាក់មកដល់ល្មម ក៏បុកគូទពីក្រោយបានបណ្តាលឲ្យម៉ូតូឌូក ហោះអូសជាង៦០ម៉ែត្របោកទៅនិងចិញ្ចើមផ្លូវយ៉ាងដំណំរហូតបង្កឲ្យមានអ្នកស្លាប់ និងរងរបួសយ៉ាងធ្ងន់ធ្ងរ។
សមត្ថកិច្ច បានឲ្យដឹងថា ក្រោយពីបានចុះធ្វើការវាស់វែងរួចដោយយកម៉ូតូទាំង២មករក្សាទុកនៅអធិការដ្ឋាននគរបាលស្រុកអន្លង់វែង ដោយឡែកអ្នករងរបួសត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកអន្លង់វែង រីឯសាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
មតិយោបល់