ភ្នំពេញៈ ជនសង្ស័យម្នាក់ ត្រូវបានសមត្ថកិច្ចឃាត់ខ្លួនជាមុខសញ្ញាជួញដូរគ្រឿងញៀនយ៉ាងសកម្ម។ ការចាប់ឃាត់ខ្លួនបានធ្វើឡើងនៅវេលាម៉ោង៣ និង១០នាទីរសៀល ថ្ងៃទី១ ខែសីហា ឆ្នាំ២០១៧ តាមផ្លូវបេតុង ក្រុមទី៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនសង្ស័យមានឈ្មោះ សម តារា ភេទប្រុស អាយុ៣២ឆ្នាំ ស្នាក់នៅសង្កាត់ស្រះចក ខណ្ឌដូនពេញ ។

ប្រភពដដែលបន្តថា មុនឈានដល់ការចាប់ឃាត់ខ្លួនជនសង្ស័យ កម្លាំងសមត្ថកិច្ចប៉ុស្តិ៍ភ្នំពេញថ្មី ដែលដឹកនាំដោយលោក ឌួង វណ្ណៈ នាយប៉ុស្តិ៍ស្តីទី ក្រោមបញ្ជារបស់លោក ម៉ក់ ហុង អធិការខណ្ឌសែនសុខ បានចេញល្បាតក្នុងមូលដ្ឋាន ក៏ប្រទះឃើញជនសង្ស័យ ដោយមានការសង្ស័យបានធ្វើការឆែករកឃើញថ្នាំញៀននៅជាប់នឹងខ្លួនចំនួន១៥កញ្ចប់តូច និងដកហូតបានម៉ូតូម៉ាកSL១គ្រឿង ពណ៌ទឹកប្រាក់ ដែលជិះដើរលក់ថ្នាំញៀន។

បច្ចុប្បន្នជនសង្ស័យ រួមនឹងវត្ថុតាង ត្រូវបានសមត្ថកិច្ច ធ្វើការសាកសួរ និងកសាងសំណុំរឿងនៅអធិការដ្ឋានខណ្ឌសែនសុខ ចាត់ការទៅតាមនីតិវិធីច្បាប់៕