ភ្នំពេញៈ រថយន្ដចំនួន២គ្រឿងបានរងការខូចខាត ខណៈដែលភាគីទាំងសងខាងបើកក្នុងល្បឿនលឿន​ បុកគ្នាយ៉ាងពេញទំហឹងនៅផ្លូវបែកជាបី តែសំណាងមិនបណ្ដោយឲ្យមនុស្សរងរបួសភ្លាមៗនោះទេ ចំណែកភាគីរថយន្ដតាក់ស៊ី១២កៅអី បានព្យាយាមបើករត់គេចខ្លួនបាត់ស្រមោល នៅសល់តែរថយន្ដហ៊ាយដាច់កង់បើកទៅមុខលែងរួច។

ហេតុការណ៍នេះបានកើតឡើងកាលពីវេលាម៉ោង២និង១១នាទីឈានចូលថ្ងៃទី២ ខែសីហា ឆ្នាំ២០១៧ ត្រង់ចំណុចជិតផ្សារទំនើបអ៊ីអន តាមបណ្តោយផ្លូវសុធារស ផ្លូវលេខ២១ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុឲ្យបានដឹងថា មុនពេលកើតហេតុគេបានឃើញរថយន្តតាក់ស៊ី១២ កៅអី មួយគ្រឿង ធ្វើដំណើរតាមបណ្តោយផ្លូវលេខ២១ ក្នុងទិសដៅពីកើតទៅលិច ក្នុងល្បឿនលឿន ខណៈពេលមកដល់កន្លែងកើតហេតុមិនបានប្រុងប្រយ័ត្នក៏បាន បុកគ្នាជាមួយរថយន្ត កាម៉ារីហ៊ាយព្រីត ពណ៌ស ទើបតែទិញមិនទាន់ពាក់ស្លាកលេខ ធ្វើដំណើរតាមបណ្ដោយផ្លូវសុធារស ក្នុងទិសដៅពីត្បូងទៅជើង បុកយ៉ាងពេញទំហឹង នៅផ្លូវបែកជាបី បណ្ដាលឲ្យរថយន្ដទាំងរងការខូចខាត តែសំណាងមិនបណ្ដោលឲ្យមនុស្សរងរបួសទេ ហើយភ្លាមៗភាគីរថយន្ដតាក់ស៊ី១២កៅអីខាងលើ បានព្យាយាមបើករត់គេចខ្លួនបាត់ស្រមោល ចំណែកភាគីខាងរថយន្ដហ៊ាយព្រីត ដាច់កង់បើកទៅមុខលែងរួច ។

ក្រោយពេលកើតហេតុ សមត្ថកិច្ចចុះមកកន្លែងកើតហេតុធ្វើការសាកសួរ តែរថយន្ដតាសុី១២កាអី បានបើករត់បាត់ស្រមោល ពីកន្លែងកើតហេតុបាត់ហើយ ក៏ដោះស្រាយមិនកើត ហើយភាគីខាងរថយន្ដហ៊ាយព្រីតក៏ទាក់ទងទៅរថយន្ដស្ទូចមកស្ទូចយកទៅជួសជុលតែម្តង។