ភ្នំពេញៈ រថយន្តដឹកគ្រឿងចក្រមួយគ្រឿង បានបើកទៅបុកក្លោងទ្វារសាលាបឋមសិក្សា បឹងត្របែកខាងត្បូង ជាប់បណ្តាលឲ្យទ្រេត និងបាក់របងរងការខូចខាតយ៉ាងដំណំ សំណាងល្អមិនបង្កឲ្យក្មេងៗសិស្សសាលា និងមនុស្សណាមម្នាក់រងគ្រោះថ្នាក់ឡើយ ហើយអ្នកបើកបរចុះរត់គេចខ្លួនបាត់ស្រមោល ខណៈដែលកំពុងតែបើកមកបត់ថយក្រោយចុះឡើងៗនោះ។

ហេតុការណ៍នេះដែរបានកើតឡើងកាលពីវេលាម៉ោង ៨ និង ៣០នាទីព្រឹក ថ្ងៃទី ២ ខែ សីហា ឆ្នាំ ២០១៧ នៅចំណុចក្លោងទ្វារសាលាបឋមសិក្សាអ្នកឧកញ៉ាមហាភក្តី ហ៊ុន នាង បឹងត្របែកខាងត្បូង ផ្លូវលេខ ២៧១ ក្នុងសង្កាត់ផ្សារដើមថ្កូវ ខណ្ឌចំការមន។

តាមប្រភពព័ត៌មានពីមន្ត្រីនគរបាលម្នាក់បានប្រាប់ឲ្យដឹងថា មុនពេលកើតហេតុ គឺរថយន្តធុនធំម៉ាក ហ៊ីយ៉ាន់ដាយ ពណ៌បៃតង ពាក់ស្លាកលេខ ស្វាយរៀង3A-0288 ដែលបានដឹកអេស្កាវ៉ាទ័រមួយគ្រឿង និងមានបុរសចំនួន ៣នាក់រួមដំណើរផងដែរនោះ បានបើកបរតាមបណ្តោយផ្លូវលេខ ២៧១ ក្នុងទិសពីលិចទៅកើត។ លុះមកដល់ចំណុចខាងលើ រថយន្តធុនធំដឹកគ្រឿងចក្រមួយគ្រឿងនោះក៏បានព្យាយាមបើកបត់ត្រឡប់ថយក្រោយវិញចុះឡើងៗ បួងចង្កូតមិនទាន់ជ្រុលទៅបុកក្លោងទ្វារ និងរបងសាលាជាប់តែម្តង ហើយបុរសទាំង ៣នាក់ដែលជិះលើនោះបាននាំគ្នាចុះរត់គេចខ្លួនប្រាស់អាយ៉ូសបាត់ស្រមោលអស់រលីងគ្មានសល់។

តាមប្រភពដដែលបានប្រាប់បន្តទៀតថា ក្រោយពេលកើតហេតុកម្លាំងមានសមត្ថកិច្ចមូលដ្ឋានក៏បានចុះមកដល់ឃើញតែរថយន្តដឹកគ្រឿងចក្របង្កនៅជាប់នឹងក្លោងទ្វារ និងរបង ដោយបណ្តាលឲ្យបាក់សសរក្លោងទ្វារម្ខាង ទ្រេតស្ទើរតែរលំ និង បាក់របងអស់មួយចំនួនរងការខូចខាតយ៉ាងដំណំ តែមិនបានបណ្តាលឲ្យកូនសិស្សសាលា ឬក៏មានមនុស្សណាម្នាក់រងគ្រោះថ្នាក់ឡើយ។

ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះមកដល់ ដោយរថយន្តដឹកគ្រឿងចក្រខាងលើបានបង្កឲ្យមានការប៉ះពាល់ដល់សម្បត្តិសារធារណៈនោះក៏បានបញ្ជូនរថយន្តដឹកគ្រឿងចក្របង្កយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើកការដោះស្រាយគ្នាជាបន្តទៅទៀត៕