ស្ទឹងត្រែងៈ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង រវាងរថយន្តម៉ាកអ៊ីស៊ុយស៊ុយ បានបុកជាមួយនឹងម៉ូតូវ៉េវ ពេញទំហឹង បណ្តាលឲ្យបុរសអ្នកបើកម៉ូតូស្លាប់យ៉ាងរន្ធត់នៅនឹងកន្លែង។

ហេតុការណ៍នេះបានកើតឡើងកាលពីថ្ងៃទី៣ ខែសីហា ឆ្នាំ២០១៧ ស្ថិតនៅចំណុចវាលវែង ភូមសំណាង ឃុំសំណាង ស្រុកថាឡាបរិវ៉ាត់ ខេត្តស្ទឹងតែ្រង។

យោងតាមប្រភពព័ត៌មានពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះកើតឡើងរវាងរថយន្តម៉ាក អ៊ីស៊ុយស៊ុយ ពណ៌ខ្មៅ ពាក់ស្លាកលេខ ភ្នំពេញ 2Z-0174 បើកបរដោយឈ្មោះ អួន ដារា ភេទប្រុស អាយុ២៣ឆ្នាំ ស្នាក់នៅភូមិស្រែក្រសាំង ឃុំស្រែក្រសាំង ស្រុកសៀមបូក ខេត្តស្ទឹងត្រែង រួមដំណើរជាមួយមនុស្សម្នាក់ទៀតក្នុងរថយន្ត លុះដល់ចំណុចកើតហេតុក៏បានបុកជាមួយនឹងម៉ូតូម៉ាកវេវ ពណ៌ខ្មៅគ្មានស្លាកលេខ ដែលកំពុងជិះដោយបុរសម្នាក់ឈ្មោះ ស៊ុន ទុយ ភេទប្រុស អាយុ៣៦ឆ្នាំ ស្នាក់នៅភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ បណ្តាលឲ្យស្លាប់យ៉ាងអាណោចអាធ័មនៅនឹងកន្លែងតែម្តង។

ក្រោយកើតហេតុ សមត្ថកិច្ចបានចុះមកធ្វើការវាស់វែង នាំយករថយន្តនិងម៉ូតូទៅរក្សាទុកនៅអធិការដ្ឋាននគរបាលខេត្តស្ទឹងត្រែង រង់ចាំធ្វើការដោះស្រាយគ្នាពេលក្រោយតាមច្បាប់បន្តទៀត​។ ចំណែកសាកសពត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី៕