លោក Jose Mourinho បានប្រាប់ Express News ថា៖ ក្រុមបីសាចក្រហម បានត្រៀមទឹកប្រាក់រួចជាស្រេច ប្រមាណជា ៩០លានផោន ដើម្បីទិញយកខ្សែប្រយុទ្ធវែល Gareth Bale ពីក្រុម Real Madrid តែមិនមែនរដូវកាលនេះឡើយ ដោយរង់ចាំរដូវកាលក្រោយសិន។

ជាការពិតណាស់ ក្រុមបីសាចក្រហម Manchester United ក្រោមការដឹកនាំរបស់លោក Jose Mourinho បានចិញ្ចឹមចិត្ត ក្នុងការទិញខ្សែប្រយុទ្ធ Gareth Bale ពីក្រុម Real Madrid ។ យ៉ាងណាវិញលោក Jose Mourinho បានបង្ហាញនូវទំហំទឹកប្រាក់រួចស្រេចហើយ ក្នុងការទិញ Bale តែអ្វីដែលសំខាន់នោះ គឺមិនមែនទិញក្នុងរដូវកាលនេះឡើយ។ បើតាម Express News បានឲ្យដឹងថា ការមិនទាន់ទិញ Bale នៅរដូវក្តៅនេះ មិនមែនមានន័យថា ក្រុមមិនចង់បានកីឡាករនោះឡើយ តែដោយសារការចំណាយលុយច្រើនពេក នៅរដូវក្តៅនេះ ដែលទាមទារឲ្យក្រុមបន្ថយការទិញកីឡាករសិន។

គួរបញ្ជាក់ផងដែរថា Man Utd បានចំណាយទឹកប្រាក់ច្រើនជាង ១០០លានផោន ហើយ ដោយបានទិញ Romelu Lukaku ពីក្រុម Everton ក្នុងតម្លៃ ៧៥លានផោន និងខ្សែការពារ Victor Lindelof ពី Benfica តម្លៃ ៣១លានផោន និង Nemenja Matic ពីក្រុមតោខៀវ Chelsea ខ្ទង់ ៥០លានផោនទៀត ខណៈកំពុងចរចារទិញ Ivan Perisic ពីក្រុម Inter Milan ប្រមាណជាជិត ៥០លានផោន ។

ហេតុនេះហើយ លោក Jose Mourinho មិនអាចចំណាយលុយច្រើនជាងនេះបានទេ ថ្វីបើក្លិបមានលុយ តែត្រូវកាត់បន្ថយការចំណាយខ្លះដែរ។ ម្យ៉ាងវិញទៀតនោះ លោក Jose Mourinho បន់ព្រះ សំពះទេវតា ដោយសង្ឃឹមថា ក្រុម Real Madrid នឹងមិនដាក់លក់ ខ្សែប្រយុទ្ធ Gareth Bale ក្នុងរដូវកាលនេះឡើយ។