ព័ត៌មានជាតិ

ពលរដ្ឋជាង៧០គ្រួសារ ផ្ទុះការតវ៉ានៅក្នុងបុរីលឹមឈាងហាក់ ពាក់ព័ន្ធនឹងបុគ្គលម្នាក់ សង់សំយ៉ាបផ្ទះរំលោភខឿនផ្លូវសារធារណៈ

ភ្នំពេញ: ប្រជាពលរដ្ឋជាង៧០គ្រួសារ ដែលរស់នៅក្នុងបុរីលឹមឈាងហាក់ ស្ថិតនៅក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ បានផ្ទុះការតវ៉ាប្រឆាំងបុគ្គលម្នាក់ ជាអ្នករស់នៅទីនោះដែរ ពាក់ព័ន្ធនិងរឿងសាងសង់សំយ៉ាបផ្ទះរំលោភ យកខឿនចិញ្ចើមផ្លូវសាធារណ: បង្កឲ្យប៉ះពាល់ដល់ការធ្វើដំណើរទៅមក ដោយថ្មើរជើងរបស់អ្នកភូមិនៅទីនោះ។

ការតវ៉ានេះ ត្រូវបានប្រជាពលរដ្ឋធ្វើឡើងជាបន្តបន្ទាប់ រហូតមកដល់វេលាព្រឹកថ្ងៃទី១៣ ខែសីហានេះ ហើយអាជ្ញាធរខណ្ឌពោធិ៍សែនជ័យ ដឹកនាំដោយលោក អភិបាលរងខណ្ឌ កែវ សុភា រួមជាមួយអាជ្ញាធរសង្កាត់ចោមចៅ និងមេភូមិព្រៃជីសាក់ ក៏បានចុះទៅពិនិត្យមើល ជាក់ស្ដែង និងហាមឃាត់ការសាងសង់នោះផងដែរ ។

ប្រភពពីប្រជាពលរដ្ឋ បានប្រាប់ឲ្យដឹងថា បុគ្គលដែលលោភលន់ មិនចេះខ្មាសអៀន រំលោភយកខឿនចិញ្ចើមផ្លូវសាធារណ: សាងសង់សំយ៉ាបផ្ទះធ្វើជាកម្មសិទ្ធិផ្ទាល់ខ្លួននោះ ឈ្មោះហេង សេងហុង ភេទប្រុស មិនដឹងថាមានអាយុប៉ុន្មានឆ្នាំនោះឡើយ ជននេះបាន ព្យាយាមសាងសង់សំយ៉ាបបិទផ្លូវថ្មើរជើងរបស់អ្នកភូមិ បែបនេះជាយូរមកហើយ ។ កន្លងមកប្រជាពលរដ្ឋជាង៧០ គ្រួសារ ដែលរស់នៅក្នុងបុរីលឹមឈាងហាក់នោះ ក៏ធ្លាប់បាននាំគ្នាផ្ដិតមេដៃ ដើម្បីធ្វើការប្រឆាងំតវ៉ា រួមទាំងបានដាក់ពាក្យបណ្ដឹងសុំការអន្តរាគមន៏ពីអាជ្ញាធរផងដែរ រហូតដល់អាជ្ញាធរចុះហាមឃាត់ ព្រមទាំងចេញសេចក្ដីជូនដំណឹងឲ្យរុះរើកន្លែង ដែលសាងសង់រួចខ្លះៗក្ដី ក៏ជននោះ មិនព្រមអនុវត្តន៍តាមឡើយ។

ដោយឡែកកាលពីវេលាព្រឹកថ្ងៃទី១២ ខែសីហា ពួកគាត់បាននាំគ្នាធ្វើការតវ៉ា ខណ:ដែលបុគ្គល នោះបន្តការសាងសង់បន្តទៀត ពេលនោះ ពួកគាត់បានលើកគ្នាទៅធ្វើការហាមឃាត់ ទើបជននោះ ឈប់ហើយរហូតមកដល់ព្រឹកថ្ងៃទី១៣ ខែសីហា ស្រាប់តែបន្តធ្វើទៀត ទើបពួកគាត់ចេញទៅហាមឃាត់ទៀត។ ពួកគាត់មិនអាចឲ្យបុគ្គលខាងលើរំលោភយកចញ្ចើមផ្លូវនោះបានទេ ព្រោះវាសំខាន់ណាស់សម្រាប់អ្នកភូមិទាំងអស់ ដែលរស់នៅទីនោះ ធ្វើដំណើរដោយថ្មើរជើង បញ្ចៀសគ្រោះ ថ្នាក់ចរាចរណ៍បាន ម្យ៉ាងទៀតចិញ្ចើមផ្លូវនេះ ត្រូវបានក្រុមហ៊ុនបុរីលឹមឈាងហាក់ រៀបឥដ្ឋកាកូឡាយ៉ាងស្អាតថែមទៀតផង គឺទុកសម្រាប់ឲ្យដើរ មិនបានឲ្យបុគ្គលណាម្នាក់រំលោភយកឡើយ ហើយចំណែកបុគ្គល ឈ្មោះហេង សេងហុង ម្នាក់នេះ និងក្រុមគ្រួសាររបស់គាត់ពិតជាម៉ាស្រុកមានមួយ លោភលន់ចង់បានអត់អៀនខ្មាសមែនហើយ។

ពាក់ព័ន្ធនឹងបញ្ហានេះ អាជ្ញាធរខណ្ឌ សង្កាត់ និងភូមិ បានចុះទៅធ្វើការហាមឃាត់ និងផ្អាកសកម្មភាពសាងសង់នោះហើយ និងប្រាប់ឲ្យបុគ្គលលោភលន់ខាងលើនោះ រួមទាំងតំណាងប្រជាពលរដ្ឋទាំងជាង៧០គ្រួសារនោះ ទៅកាន់សាលាខណ្ឌពោធិ៍សែនជ័យ នាថ្ងៃទី១៤ ខែសីហា ឆ្នាំ២០១៧ ដើម្បីជួបធ្វើការដោះស្រាយគ្នាបញ្ចប់រឿង៕

មតិយោបល់