ភ្នំពេញៈ បុរសម្នាក់សង្ស័យស្រវឹង បានបើករថយន្តម៉ាកកាមរីបាឡែនក្នុងល្បឿនលឿនខ្វះការប្រុងប្រយត្ន័លុះបានមកដល់ចំណុចមុខសាលាបាក់ទូក រថយន្តបានជ្រុលចង្កួតបុករបាំងថ្មចែកទ្រូងផ្លូវពេញទំហឹង បណ្តាលឲ្យខូចខាត ចំណែករថយន្តវិញខ្ទេចផ្នែកខាងមុខស្ទើរទាំងស្រុង។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ៦ព្រឹកថ្ងៃទី១៦ ខែសីហា ឆ្នាំ២០១៧ ស្ថិតនៅតាមបណ្តោយផ្លូវខាងមុខសាលាបាក់ទូក ក្នុងសង្កាត់វាល់វង់ ខណ្ឌ៧មករា រាជធានីភ្នំពេញ។

យោងតាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តម៉ាកកាមរីបាឡែនមួយគ្រឿង ពណ៌ឈាមជ្រូក ពាក់ស្លាកលេខ ភ្នំពេញ 2F-5396 បើកបរដោយបុរសម្នាក់សង្ស័យស្រវឹង បានធ្វើដំណើរតាមបណ្តោយផ្លូវលេខ១៦៩ ក្នុងល្បឿនយ៉ាងលឿន ពីត្បូងមកជើង លុះដល់ចំណុចមុខវិទ្យាល័យបាក់ទូក ស្រាប់តែរថយន្តនោះបានរេចង្កូតជ្រុលទៅបុកនឹងរបាំងថ្មចែកទ្រូងយ៉ាងពេញទំហឹង បណ្តាលឲ្យរបាំងថ្មខ្ទាតចេញពីកន្លែងដើម២កង់រងការខូចខាត។ ចំណែករថយន្តវិញបានខូចខាតផ្នែកខាងមុខចំហៀងខាងឆ្វេង ស្ទើរទាំងស្រុង រីឯអ្នកបើកបររថយន្តខាងលើបានរងរបួសស្រាល ព្រោះទ្រូងរបស់គេបុកជាមួយចង្កូតដែលមិនផ្ទុះពោង ហើយក្បាលបោកនិងកញ្ចក់មុខទៀត ក៏ត្រូវបានក្រុមគ្រួសារមកដឹកយកទៅមន្ទីរពេទ្យផងដែរ។

ក្រោយកើតហេតុសមត្ថកិច្ចមូលដ្ឋានបានសហការគ្នា ជាមួយសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលក្រោយតាមច្បាប់បន្តទៀត៕