ភ្នំពេញៈ គ្រោះថ្នាកើចរាចរណ៍មួយបានកើតឡើង រវាងររថយន្តម៉ាក ហាយឡែនឌ័រមួយគ្រឿង បើកមិនប្រយត្ន័បានបុកជាមួយម៉ូតូម៉ាក ស៊ុយសាគីលែត ពេញទំហឹងត្រង់ចំណុចស្តុបបែកជាបួន ធ្វើឲ្យម៉ូតូហោះផ្លោងទៅបុកកន្លែងលក់បាយឆា មីឆា ដែលនៅលើចិញ្ចើមផ្លូវ បណ្តាលឲ្យយុវជនប្រុសស្រី៣នាក់រងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះ បានកើតឡើងកាលពីវេលាម៉ោង១និង៣០នាទីយប់ឈានចូលថ្ងៃទី២២ ខែសីហា ឆ្នាំ២០១៧ តាមបណ្តោយមហាវិថី ម៉ៅសេទុង កែងនិងផ្លូវលេខ១៩៩ ក្នុងសង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ។​

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញ បុរសម្នាក់ បើករថយន្ត ហាយឡែនឌ័រ មួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AB- 0246 បានធ្វើដំណើរតាមបណ្តោយមហាវីថី ម៉ៅសេទុង ក្នុងទិសដៅពីត្បូងទៅជើង ក្នុងល្បឿនយ៉ាងលឿន ខណ:មកដល់កន្លែងកើតហេតុត្រង់ចំណុចស្តុបបែកជាបួន កែងនិងផ្លូវលេខ១៩៩ ក៏មានយុវជនប្រុសស្រី៣នាក់ ប្រុស២នាក់ ស្រីម្នាក់ ជិះម៉ូតូឌុបគ្នាមួយគ្រឿងម៉ាកស៊ុយសាគីលែត ពណ៌ស ពាក់ស្លាកលេខ ភ្នំពេញ 1DA- 0196 បានធ្វើដំណើរតាមបណ្តោយផ្លូវលេខ១៩៩ ក្នុងទិសដៅពីកើតមកលិច ក៏បានបុកគ្នា ជាមួយរថយន្ត ហាយឡែនឌ័រ ខាងលើ យ៉ាងពេញទំហឹង បណ្តាលឲ្យម៉ូតូស៊ុយសាគីលែត ហោះផ្លោង ទៅបុក កន្លែងលក់បាយឆា មីឆា ដែលនៅលើចិញ្ចើមផ្លូវខ្ទេចខ្ទីអស់រលីង និងធ្វើឲ្យអ្នកជិះម៉ូតូទាំង៣នាក់ខាងលើ រងរបួសធ្ងន់ធ្ងរ ត្រូវបានរថយន្តសាមុយដឹកបញ្ជូនទៅមន្ទីរពេទ្យធ្វើការសង្គ្រោះបន្ទាន់ភ្លាមៗ។ រីឯរថយន្តនិងម៉ូតូ​បានរងការខូចខាតយ៉ាងដំណំទាំងសងខាងតែម្តង ។​

ក្រោយពេលកើតហេតុ សមត្ថកិច្ចជំនាញចរាចរណ៍ បានចុះមកធ្វើការវាស់វែងយករថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំភាគីទាំងសងខាងមកធ្វើការដោះស្រាយគ្នានៅពេលក្រោយតាមច្បាប់បន្តទៀត ៕

https://youtu.be/R4U9fPRH9PU