នៅទីបំផុតចម្រៀងមួយបទក្រោមចំណងជើងថា «ភ្លៀងជីវិត» របស់អ្នកនាង ខាត់ សុឃីម ត្រូវបានចេញបង្ហោះនូវ Full MV ហើយ បន្ទាប់ពីបទថ្មីមួយនេះត្រូវគេកត់សម្គាល់ថាជាបទកម្សត់ដែលស្ដែងឡើងពីជីវិតរបស់ស្រ្តីម្នាក់ ដែលមានស្ថានភាពស្រដៀងនឹងជីវិតកាលពីអតីតរបស់អ្នកនាងផងដែរ។ ចម្រៀងមួយបទនេះ គ្រាន់តែចេញបង្ហោះ Full MV ភ្លាម មានការចែកចាយ និងចូលទស្សនាពីសំណាក់អ្នកនិយមបទប្រភេទមនោសញ្ចេតនាជាច្រើននោះផង ជាពិសេសសម្រាប់ស្រ្តីវ័យកណ្ដាលដែលមានប្រវត្តិមិនសូវរៀនបានខ្ពស់ ព្រោះតែពាក្យស្រ្តីបង្វិលចង្ក្រានមិនជុំនោះ។

អ្នកនាង ខាត់ សុឃីម និយាយថា ចម្រៀងមួយបទនេះ គឺជាចម្រៀងដែលស្ដែងពីជីវិតរបស់ស្រ្តីជោគជ័យម្នាក់នាពេលបច្ចុប្បន្ន ដែលកាលពីអតីតកាលគឺអ្នកស្រីក៏ពោរពេញដោយជីវិតយ៉ាងអភ័ព្វមិនខុសពីការសម្ដែងនៅក្នុងផ្ទៃរឿងនោះទេ។ អ្នកនាងថាខ្សែជីវិតក្នុងបទចម្រៀង និងជីវិតពិតរបស់ខ្លួនមានភាពមិនសូវខុសគ្នានោះទេ ទើបអ្នកនាងគ្រាន់តែច្រៀងបទនេះ និងបានសម្ដែងបទនេះ ក៏ស្រក់ទឹកភ្នែកតែម្ដង ដោយសារតែកាលពីអតីតកាលអ្នកនាងក៏មិនមានឱកាសបានសិក្សាច្រើន ព្រោះតែរងបន្ទុកត្រូវជួយរកលុយឪពុកម្ដាយ និងចិញ្ចឹមបងប្អូន។

អ្នកនាងថាមួយបទនេះ មិនខុសពីដាស់សតិឲ្យអ្នកនាងនៅតែនឹកអតីតកាលនោះទេ បើទោះជាអ្នកនាងមិនដែលធ្វើសំណង់ និងអូលបន្លែតាមផ្សាររកលុយដូចគ្នានឹងចម្រៀងដែលបានសម្ដែងក្នុងបទ «ភ្លៀងជីវិត»។ អ្នកនាងថាក្នុងពេលខាងមុខ អ្នកនាងនឹងចេញបទមួយដែលនិយាយពីប្រវត្តិតស៊ូយ៉ាងកម្សត់របស់ខ្លួនទាំងស្រុងតាមលំនាំនេះតែម្ដង ដើម្បីបង្ហាញបទពិសោធន៍ឲ្យមានការវិភាគថាទម្រាំឈានដល់ដំណាក់កាលជោគជ័យដល់បច្ចុប្បន្នគឺជីវិតរបស់អ្នកនាងកម្សត់លើសពីម្ចាស់ចម្រៀងក្នុងបទ«ភ្លៀងជីវិត»នោះទៅទៀត។ អ៉ីចឹងហើយទើប MV របស់អ្នកនាងមានអ្នកត្រូវចិត្តច្រើនដោយសរសើរថានេះជាចម្រៀងយ៉ាងកម្សត់ដែលជួយឲ្យបទថ្មីរបស់អ្នកនាងទាក់ទាញ។

ចង់ដឹងថា Full MV បទ «ភ្លៀងជីវិត» របស់អ្នកនាងខាត់ សុឃីម កម្សត់យ៉ាងណា សូមអញ្ជើញទស្សនា៖

https://www.youtube.com/watch?v=pWNEuVpDlGo