កំពតៈ លោកអធិការងស្រុកអង្គរជ័យទទួលបន្ទុកផ្នែកចរាចរណ៍ បានប្រាប់ Post News ថា មានករណីគ្រោះថ្នាក់ចរាចរណ៍រវាងរថយន្ត និងម៉ូតូបើកបញ្រ្ចាសទិសគ្នា ធ្វើឲ្យបុកគ្នាយ៉ាងពេញទំហឹង បណ្តាលឲ្យបុរសម្នាក់ស្លាប់ភ្លាមៗនៅនឹងកន្លែងកើតហេតុ។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង២យប់រំលងអធ្រាត្រឈានចូលថ្ងៃទី២១ ខែសីហា ឆ្នាំ២០១៧ នៅលើកំណាត់ផ្លូវជាតិលេខ៣១ ត្រង់ចំណុចភូមិអង្គរជ័យក្រោម ឃុំអង្គរជ័យ ស្រុកអង្គរជ័យ ខេត្តកំពត។

ប្រភពព័ត៌មានបានឲ្យដឹងថា ជនរងគ្រោះឈ្មោះ វ៉ិត បឿន ភេទប្រុស អាយុ២៨ឆ្នាំ រស់នៅភូមិត្រពាំងចក ឃុំភ្នំកុង ស្រុកអង្គរជ័យ ខេត្តកំពតត (ស្លាប់) បើកបរម៉ូតូម៉ាកសង់ ហុងដាឌ្រីមC125 ស៊េរី០១៤ ពណ៌ខ្មៅ ពាក់ស្លាកលេខភ្នំពេញ 1CG-9016។ ចំណែករថយន្តបង្កហេតុបានបើករត់គេចខ្លួនបាត់ ក្រោយពេលកើតហេតុ ដោយពុំស្គាល់អត្តសញ្ញាណនោះទេ។

ក្រោយពេលកើតហេតុសាកសពជនរងគ្រោះត្រូវបានប្រគល់ជូនសាច់ញាតិយកទៅរៀបចំធ្វើបុណ្យតាមប្រពៃណី៕