បាត់ដំបងៈ ពិតជាសាហាវមែន ដោយបុរសម្នាក់សុំលុយម្ដាយមីងមិនបាន ស្ទុះទៅទាញពូថៅដេញកាប់ បណ្ដាលឲ្យរបួសធ្ងន់២នាក់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះកើតឡើងកាលពីវេលាម៉ោង៣និង៣០នាទីី រសៀលថ្ងៃទី២៣ ខែសីហា ឆ្នាំ២០១៧ នៅចំណុចក្រុមទី៧ ភូមិកគោ ឃុំជ្រៃ ស្រុកថ្មគោល ខេត្តបាត់ដំបង។

ជនសង្ស័យមានឈ្មោះ កាយ ចន្ថា ហៅកុយ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់មានទីលំនៅភូមិ ឃុំ កើតហេតុខាងលើ បានធ្វើសកម្មភាពយកពូថៅដងឈើប្រវែងប្រហែល៤តឹក មុខផ្លែ ហ៊ុនកាប់ទៅលើជនរងគ្រោះចំនួន២នាក់ ទី១ឈ្មោះ ទឹម សម្ផស្ស ហៅង៉ា ភេទប្រុស អាយុ១៥ឆ្នាំ មុខរបរនៅផ្ទះរស់នៅភូមិកើតហេតុខាងលើ ចំក្បាលខាងលើចំផ្នែកខាងឆ្វេង១ពូថៅ(របួសធ្ងន់) និងទី២ឈ្មោះ ចិន សុភា ហៅទូច ភេទស្រី អាយុ៣៣ឆ្នាំ មុខរបរមេផ្ទះ រស់នៅភូមិ ឃុំកើតហេតុខាងលើ ត្រូវក្បាលមួយពូថៅ នឹងថ្ពាល់ផ្នែកខាងឆ្វេង២ពូថៅ បណ្ដាលឲ្យរបួសធ្ងន់ហើយ ជនរងគ្រោះ២នាក់ម្ដាយនិងកូន ត្រូវបានយកទៅសង្គ្រោះបន្ទាន់នៅមន្ទីពេទ្យមេរេចេនសីុ ខេត្តបាត់ដំបង។

លុះមកដល់ថ្ងៃទី២៤ ខែសីហា ឆ្នាំ២០១៧ កម្លាំងអាវុធហត្ថទទួលបានព័ត៌មាន ក៏បានចុះទៅដល់កន្លែងកើតហេតុ ទទួលបណ្ដឹងពីប្ដីជនរងគ្រោះឈ្មោះ ទឹម ចាន់ធួ ភេទប្រុស អាយុ៣៥ឆ្នាំ មុខរបរ កម្មករ នៅប្រទេសថៃ រស់នៅភូមិ ឃុំកើតហេតុខាងលើ ក្រោយពីកម្លាំងយើងទទួលបានបណ្ដឹង លុះដល់ម៉ោង២រសៀល ថ្ងៃខែឆ្នាំដដែល បានធ្វើការឃាត់ខ្លួនជនសង្ស័យខាងលើនៅចំនុចភូមិត្រាង ឃុំអូរតាគី ស្រុកថ្មគោល ខេត្តបាត់ដំបង យកមកមូលដ្ឋានកងរាជអាវុធហត្ថស្រុកថ្មគោល ដើម្បីចាត់ការតាមនីតិវិធីច្បាប់៕