បាត់ដំបងៈ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តនឹងម៉ូតូ ដែលបណ្តាលឲ្យស្រ្តីម្នាក់ស្លាប់ភ្លាមៗនៅនឹងកន្លែង។

ហេតុការណ៍កើតឡើងនៅវេលាម៉ោង១០ និង១៥នាទីព្រឹក ថ្ងៃទី២៥ ខែសីហាឆ្នាំ២០១៧ នៅផ្លូវជាតិលេខ៥ ត្រង់ចំណុចក្រុមទី១០ ភូមិកគោ ឃុំជ្រៃ ស្រុកថ្មគោល ខេត្តបាត់ដំបង។

ជនរងគ្រោះមានឈ្មោះ អ៊ឹង រច្ចនា ភេទស្រី អាយុ២៤ឆ្នាំ ស្នាក់នៅភូមិប៉ោយសំរោង ឃុំតាពូង ស្រុកថ្មគោល ខេត្តបាត់ដំបង។

តាមប្រភពព័ត៌មានពីកន្លែងបានឲ្យដឹងថា មុនពេលកើតហេតុ គេបានឃើញម៉ូតូម៉ាកMSX ១គ្រឿង ពណ៌លឿង ពាក់ស្លាកលេខ បាត់ដំបង1U-1880 ជិះពីទិសខាងត្បូងឆ្ពោះទៅទិសខាងជើង ពេលមកដល់ចំណុចកើតហេតុ ត្រូវរថយន្តធន់ធំ ពណ៌ទ្រេអ៊ី ១គ្រឿង បានឡើងជែងរថយន្តមួយទៀតស្របទិសគ្នា បណ្ដាលឲ្យរ៉េចង្កូតទៅបុកនឹងម៉ូតូចំពេញទំហឹង បណ្ដាលឲ្យអ្នកបើកបរម៉ូតូស្លាប់នៅនឹងកន្លែងកើតហេតុតែម្ដង។

ចំណែកអ្នកបើកបររថយន្តបានបើកបន្តគេចខ្លួនរហូតដល់ភូមិអូរសង្កែ ស្រុកថ្មគោល ខេត្តបាត់ដំបង ក៏ត្រូវបានសមត្ថកិច្ចស្រុកថ្មគោល ឃាត់ខ្លួនបានយកមកសាកសួរនៅអធិការដ្ធាននគរបាលស្រុកថ្មគោលដើម្បីដោះស្រាយតាមនីតិវិធីច្បាប់។

ចំពោះសាកសព ជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកធ្វើបុណ្យតាមប្រពៃណី៕