ភ្នំពេញៈ រថយន្តម៉ាក ឡិចស៊ីស RX300 មួយគ្រឿង បើកបរដោយបុរសជនជាតិស្បែកខ្មៅម្នាក់ ក្នុងល្បឿនយ៉ាងលឿនដូចហោះ ហើយបានបើកវ៉ារថយន្តកូរ៉េ មួយគ្រឿងទៀតមិនផុតក៏ជ្រុលចង្កូតទៅបុកឡើងសួនច្បារចែកទ្រូងផ្លូវបណ្តាលឲ្យក្រឡាប់៣ជុំ និងរងរបួសស្រាល ៣នាក់។​

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១០និង៤៥នាទីព្រឹក ថ្ងៃទី២៦ ខែសីហា ឆ្នាំ២០១៧ ដែលស្ថិតនៅតាមបណ្តោយផ្លូវជាតិលេខ៥ ត្រង់ចំណុចមុខការ៉ាសសាំងសូគីមិច ភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្ត មួយគ្រឿង ម៉ាកឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2M-9477 ជិះដោយជនជាតិស្បែកខ្មៅប្រុសស្រី៣នាក់ បើកបរតាមផ្លូវជាតិលេខ៥ ក្នុងទិសដៅពីជើងទៅត្បូងក្នុងល្បឿងយ៉ាងលឿន ខណៈពេលមកដល់ចំណុចកើតហេតុខាងលើ ក៏បានបើកវ៉ាខាងឆ្វេងដៃរថយន្តកូរ៉េមួយគ្រឿង ដែលកំពុងបើកបរស្របទិសដៅគ្នា ហើយវ៉ាមិនផុតជ្រុលចង្កូតមកខាងឆ្វេងដៃ ជ្រុលទៅបុកឃឿនឡើងថ្មសួនច្បារចែកទ្រូងផ្លូវក្រឡាប់៣ជុំ ចូលមកចំណែកផ្លូវម្ខាងទៀត តែសំណាងល្អមិនប៉ះពាល់ដល់អ្នកធ្វើដំណើរតាមដងផ្លូវនោះឡើយ ហើយក្រោយកើតហេតុអ្នកបើកបររថយន្ត និងអ្នករួមដំណើរទាំង​ ៣នាក់បាននាំគ្នាលូនចេញហៅរថយន្តឈ្នួលឡើងជិះរត់គេចខ្លួនបាត់ស្រមោលតែម្តង។

ក្រោយពីកើតហេតុ សមត្ថកិច្ចមូលដ្ឋានបានចុះទៅដល់កន្លែងកើតហេតុ និងបានពិនិត្យរួចរាល់ហើយក៏ហៅរថយន្តមកស្ទូចរថយន្តរងគ្រោះខាងលើទៅរក្សារទុកនៅចរាចរណ៍នគរបាលខណ្ឌព្រែកព្នៅ ដើម្បីរង់ចាំម្ចាស់រថយន្តចូលខ្លួនដោះស្រាយតាមច្បាប់បន្តទៀត៕

https://youtu.be/q9WRN3lvi6Y