ស្វាយរៀង: ដោយមានការបញ្ជាផ្ទាល់ពីលោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង លោកឧត្តមសេនីយ៍ត្រី កុយ សុភាព បានដឹកនាំកម្លាំងជំនាញ ការិយាល័យព្រហ្មទណ្ឌកម្រិតធ្ងន់, ការិយាល័យព្រហ្មទណ្ឌកម្រិតស្រាល, ការិយាល័យបច្ចេកទេសវិទ្យាសាស្ត្រ សហការជាមួយកម្លាំងជំនាញពេទ្យមន្ទីរសុខាភិបាលខេត្ត, កម្លាំងកងរាជអាវុធហត្ថខេត្តស្រុក និងកម្លាំងអធិការដ្ឋាននគរបាលស្រុកស្វាយជ្រំ និងមានការសម្របសម្រួលពីព្រះរាជអាជ្ញាអមសាលាដំបូង ខេត្តស្វាយរៀង បានស្រាវជ្រាវស៊ើបអង្កេត អស់រយៈពេលតែ០៨ ម៉ោងប៉ុណ្ណោះ ក៏បំបែកសំណុំរឿងករណីឃាតកម្ម គិតទុកជាមុន ដែលបានបាញ់សម្លាប់ ទៅលើជនរងគ្រោះ ឈ្មោះ វ៉ា សំអូន ភេទ ស្រី អាយុ ៤០ ឆ្នាំ នៅភូមិតាប៉ ឃុំតាសួស ស្រុកស្វាយជ្រំ ខេត្តស្វាយរៀង។

ដោយសមត្ថកិច្ចបានកំណត់មុខសញ្ញា និងចាប់ជនសង្ស័យបានចំនួន ០២ នាក់៖ ១ – ឈ្មោះ សូ ឈន (ហៅជន) ភេទប្រុស អាយុ ៥៣ ឆ្នាំ នៅភូមិ តាប៉ ឃុំតាសួស ស្រុកស្វាយជ្រំ ខេត្តស្វាយរៀង ( ត្រូវជាប្តីចុងជនរងគ្រោះ ) និង២ – ឈ្មោះ សូ សាមឿន ភេទ ប្រុស អាយុ ៥២ ឆ្នាំ នៅភូមិចំបក់កោង ឃុំតាសួស ស្រុកស្វាយជ្រំ ខេត្រស្វាយរៀង ( ត្រូវជាប្អូនបង្កើតជនសង្ស័យ សូ ឈន )

វត្ថុតាងដកហូតរួមមាន៖ អាវុធAK កាត់ស្វាយ០១ដើម គ្រាប់ចំនួន ២៧ គ្រាប់ ។ បច្ចប្បន្នសមត្ថកិច្ច កំពុងកសាងសំណុំរឿង ដើម្បីចាត់ការតាមផ្លូវច្បាប់៕