ភ្នំពេញៈ សមត្ថកិច្ចប៉ុស្តិ៍កន្ទោកចុះឆែកឆេរបន្ទប់ជួលមួយកន្លែង និងឃាត់ខ្លួនបានជនសង្ស័យចំនួន៥នាក់ ពាក់ព័ន្ធករណីផ្ទុកសារធាតុញៀនខុសច្បាប់។

ប្រតិបត្តិការនេះបានធ្វើឡើងកាលពីវេលាម៉ោង១០និង២០នាទីយប់ ថ្ងៃទី២៧ ខែសីហា ឆ្នាំ២០១៧ នៅបន្ទប់ជួលលេខC62 ជាន់ទី១ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានបានឲ្យដឹងថា ការចុះឆែកឆេរនេះសមត្ថកិច្ចធ្វើការឃាត់ខ្លួនជនសង្ស័យបាន៥នាក់ ទី១មានឈ្មោះ ចឹក អ៊ី ភេទប្រុសអាយុ២០ឆ្នាំ មុខរបរមិនពិតប្រាកដ ទី២ឈ្មោះ វុធ គង់ ភេទប្រុស អាយុ២០ឆ្នាំ មុខរបរមិនពិតប្រាកដ ទី៣ឈ្មោះ ថេង ផល្លា ភេទស្រីអាយុ២១ឆ្នាំ មុខរបរកម្មការិនីរោងចក្រ ទី៤ឈ្មោះ ឈឹម ស៊ីណា ភេទស្រី អាយុ១៨ឆ្នាំ មុខរបរកម្មការិនីរោងចក្រ (ទាំង៤នាក់ស្នាក់នៅបន្ទប់ជួលលេខC62 ជាន់ទី១ ភូមកន្ទោកជើង សង្កាត់កន្ទោក ខណ្ឌពោធិ៍សែនជ័យ)។ និងទី៥មានឈ្មោះ ខ្លឹង រិន ភេទប្រុស អាយុ២៤ឆ្នាំ មុខរបរមិនពិតប្រាកដ ស្នាក់នៅបន្ទប់ជួលលេខ២ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ។

ប្រភពដដែលពីសមត្ថកិច្ចបានឲ្យដឹងទៀតថា វត្ថុតាងដែលបានដកហូតមានដូចជា ដបកែឆ្នៃ សម្រាប់ជក់គ្រឿងញៀនចំនួន១។
ជនសង្ស័យ ទាំង៥នាក់ត្រូវនគរបាលប៉ុស្តិ៍កន្ទោកឃាត់ខ្លួនយកមកសួរនាំ និងកសាងឯកសារបញ្ចូនទៅកាន់ផ្នែកជំនាញយុត្តិធម៌នៃអធិការរដ្ឋាននគរបាលខណ្ឌពោធិ៍សេនជ័យ ដើម្បីចាត់ការបន្តតាមនីតិវិធីច្បាប់៕