កំពង់ចាមៈ លោកអធិការរងស្រុកចំការលើ បានប្រាប់Post News ថា មានគ្រោះថ្នាក់ចរាចរណ៍បានកើតឡើងម៉ូតូ១គ្រឿង ម៉ាក យ៉ាម៉ាហា ពណ៌ស គ្មានស្លាកលេខ ជិះពីលិចទៅកើត បានរេចង្កូតធ្លាក់ផ្លូវបណ្តាលឲ្យស្លាប់នៅកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង៦ និង៣០នាទីយប់ ថ្ងៃទី១ ខែកញ្ញា ឆ្នាំ២០១៧ នៅលើផ្លូវលេខ២២ ស្ថិតត្រង់ចំណុចខាងកើតស្ពានត្រពាំងកណ្តាល ចម្ងាយប្រហែល២០០ម៉ែត្រ ក្នុងភូមិបន្ទាយជ័យ ឃុំស្ពឺ ស្រុកចំការលើ ខេត្តកំពង់ចាម។

សមត្ថកិច្ចបានឲ្យដឹងថា ជនរងគ្រោះមានឈ្មោះ យិន ឡាង ភេទប្រុស អាយុ២២ឆ្នាំ ស្នាក់នៅភូមិតាអុង ឃុំតាអុង ស្រុកចំការលើ ខេត្តកំពង់ចាម។

លោកអធិការរងស្រុកចំការលើ បានបញ្ជាក់ពីមូលហេតុ បណ្តាលមកពីបើកបរក្នុងស្ថានភាពស្រវឹង។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងប្រគល់សាកសពនិងម៉ូតូឲ្យទៅក្រុមគ្រួសារយកទៅធ្វើបុណ្យតាមប្រពៃណី៕