ភ្នំពេញៈ ជនសង្ស័យប្រុសស្រី២នាក់ ត្រូវបានកម្លាំងសមត្ថកិច្ចខណ្ឌព្រែកព្នៅ ធ្វើការឃាត់ខ្លួនក្រោយពីឆែកឆេររកឃើញថ្នាំញៀន៣កញ្ចប់។

ប្រតិបត្តិការនេះបានធ្វើឡើងកាលពីវេលាម៉ោង៥ល្ងាច ថ្ងៃទី៤ ខែកញ្ញា ឆ្នាំ២០១៧ ដែលស្ថិតនៅត្រង់ចំណុចផ្លូវជាតិលេខ៥ ស្ថិតក្នុងភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ។

ប្រភព័ត៌មានបានឲ្យដឹងថា ជនសង្ស័យទាំង២នាក់ ម្នាក់មានឈ្មោះ យ៉ា ហ្វាស៊ី ភេទប្រុស អាយុ ២៣ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខ ភូមិ២ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ និងម្នាក់ទៀតឈ្មោះ រឿន ភីម ភេទស្រី អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលេខ១៥១ ភូមិព្រែកព្នៅ ខណ្ឌព្រែកព្នៅ រាជធានីភ្នំពេញ។

ប្រភពដដែលពីសមត្ថកិច្ចបានប្រាប់ឲ្យដឹងទៀតថា នៅមុនពេលកើតហេតុ កម្លាំងល្បាតរបស់អធិការដ្ឋាននគរបាលខណ្ឌព្រែកព្នៅ បានចេញល្បាតក្នុងមូលដ្ឋាន លុះដល់ត្រង់ចំណុចកើតហេតុ ក៏ប្រទះឃើញជនសង្ស័យចំនួន ២នាក់ កំពុងជិះម៉ូតូ១គ្រឿង ម៉ាកហុងដាសេ១០០ ពណ៌ក្រហម ពាក់ស្លាកលេខ ទ-7475 ភព1 ដោយជិះក្នុងទិសដៅពីជើងទៅត្បូង ដោយមានការសង្ស័យកម្លាំងយើងក៏ធ្វើការឃាត់ត្រួតពិនិត្យ រួចក៏ប្រទះឃើញក្រាមពណ៌សថ្លាចំនួន៣កញ្ចប់ថង់តូច។

ក្រោយមក កម្លាំងសមត្ថកិច្ចយើងក៏ធ្វើការឃាត់ខ្លួនជនសង្ស័យប្រុសស្រីទាំង២នាក់នេះ មកកាន់អធិការដ្ឋាននគរបាលខណ្ឌព្រែកព្នៅ ដើម្បីសាកសួរ និងកសាងសំណុំរឿងបញ្ជូនទៅតុលាការ៕