មណ្ឌលគិរីៈ លោកអធិការរងស្រុកកែវសីមា បានប្រាប់ Post News ថា មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូបុកជាមួយម៉ូតូក្នុងទិសដៅបញ្រ្ចាសទិសគ្នា ពីលិចទៅកើត
បណ្តាលឲ្យបុរស២នាក់ បានស្លាប់នៅនឹងកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង៩យប់ ថ្ងែទី៦ ខែកញ្ញា ឆ្នាំ២០១៧ ត្រុងចំណុចព្រំប្រទល់ ស្រុកកែវសីមា និងព្រំប្រទល់ស្រុកស្នួល ខេត្តក្រចេះ។

សាកសពជនរងគ្រោះទាំង២នាក់ ម្នាក់មានឈ្មោះ សេង សុផារ៉ា ភេទប្រុស អាយុ២៥ឆ្នាំ ជនជាតិខ្មែរ មុនរបរកសិករ (ស្លាប់) មានទីលំនៅភូមិឡាប៉ាខេ ឃុំស្រែខ្ពម ស្រុកកែវសីមា ខេត្តមណ្ឌលគិរី។ និងម្នាក់ទៀតឈ្មោះ អាន ជី ភេទប្រុស អាយុ៣១ឆ្នាំ ជនជាតិពួង មុខរបរកសិករ មានទីលំនៅភូមិឆ្នែង ឃុំស្រែរួម ស្រុកកែវសីមា ខេត្តមណ្ឌលគិរី ស្លាប់ភ្លាមៗនៅនឹងកន្លែងកើតហេតុ។

បច្ចុប្បន្នសពជនរងគ្រោះទាំង២នាក់ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕