ពោធិ៍សាត់ៈ លោកវរសេនីយ៍ទោ យឹម ស៊ាងហៃ អធិការក្រុងពោធិ៍សាត់ បានប្រាប់Post Newsថា មានករណីបុរសម្នាក់ចុះងូតទឹកអាង បណ្តាលឲ្យលង់ស្លាប់នៅក្នុងបរិវេណវត្តពាលញែក យ៉ាងអាណោចអាធ័ម។

ហេតុការណ៍នេះកើតឡើងកាលពីវេលាម៉ោង២និង៣០នាទីល្ងាច ថ្ងៃទី៨ ខែកញ្ញា ឆ្នាំ២០១៧ ស្ថិតនៅចំណុចភូមិចម្ការចេកខាងជើង សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។

សាកសពជនរងគ្រោះខាងលើ មានឈ្មោះ ណុល យ៉ុង ភេទប្រុស អាយុ៣៧ឆ្នាំ រស់នៅក្នុងភូមិកើតហេតុខាងលើ។

ក្រោយការពិនិត្យរកឃើញថា ជនរងគ្រោះខាងលើនេះ បានផឹកស្រវឹង រួចចុះងូតទឹកអាង ក៏បណ្តាលឲ្យលង់ស្លាប់បែបនេះតែម្តង ហើយបច្ចុប្បន្នត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី៕